Numri 9, në bllokun e trajnerit Xhani De Biazi

Trajneri i kombëtares, Xhani de Biazi, në supersfidën e Korçës ka pëlqyer dhe përcaktuar si lojtarin kyç të fitores së Skënderbeut, sulmuesin Sebino Plaku

Në një intervistë të dhënë për emisionin Skaner Kampionat mbrëmë, trajneri i kombëtares, Xhani de Biazi, ka folur për supersfidën e Korçës, çështjen e titullit dhe për rekrutimin e lojtarëve të tjerë në radhët e kuqezinjve. Ja çfarë ka thënë ai:

- Mister, si tu duk ndeshja në Korçë mes Skënderbeut dhe Tiranës, çfarë vendosi në këtë finale të Superligës.

- Le të themi se janë dy skuadrat, bashkë me Teutën, më të rëndësishmet e kampionatit. Ndeshja më pëlqeu, një ndeshje shumë e ekuilibruar. Në pjesën e parë luajti më mirë Tirana, në të dytën Tirana pagoi hapësirat në mbrojtje dhe pësoi golat në dy kundërsulme. E pastaj takimi u mbrojt mirë nga Skënderbeu.

 - Kush gaboi më shumë, trajneri i Skënderbeut, apo ai i Tiranës?

- Unë them se trajnerët e bënë mirë punën e tyre. Dy skuadrat ishin të vendosura mirë në fushë dhe kryen veprime të mira. Pastaj është e qartë se në një ndeshje ka edhe faktorë të tjerë. Tensioni, nervozizmi luajnë një rol të rëndësishëm. Unë fola me tre lojtarët që kam grumbulluar, Lika, Muzaka e Shehi, dhe më thanë se ishim shumë të tendosur në fillim, kështu që pësuan inisiativën e Tiranës.

- A është kampionati shqiptar një mundësi për të zbuluar lojtarë të rinj për kombëtaren.

- Mund të jetë një mundësi. Ky nuk është një kampionat i nivelit të lartë. Le të themi se superiorja shqiptare, në nivelin italian nuk jam i sigurtë nëse dy apo tre skuadrat e para, mund të konkurojnë në Serinë B italiane. Por është gjithnjë e vështirë të bëhen këto krahasime. Gjeja më e rëndësishme për mua është që lojtarët të kenë kualitet teknik, njohje taktike dhe mentalitetin e duhur, për tu thërritur në kombëtare

- Misioni juaj ishte vetëm për të parë ndeshjen, apo kishit edhe ndonjë plan tjetër?

- Unë desha ta shoh më nga afër. Unë e ndjek kampionatin shqiptar me dekoder nga shtëpia, sepse shpesh më duhet të udhëtoj nëpër Europë, të shoh edhe lojtarë të tjerë, gjë që e bëra në grumbullimin e fundit me Canin, apo Zeqirin, e me Bakajn gjithashtu. Unë dhe stafi im vazhdojmë të kërkojmë lojtarë të rinj, për të thërritur në kombëtare njerëz që luajnë jashtë Shqipërisë në kampionate më kompetitivë.

- Kush mund ta fitojë kampionatin në Shqipëri?

- Kush mund ta fitojë kampionatin! E vështirë, sepse është një kampionat i paqartë, kështu që tani ecuria e Skënderbeut kalon në nyjen Flamurtari, ndërsa dy të tjerat: Teuta dhe Tirana, kanë një rrugë ndoshta më të lehtë, por nuk është e thënë, sepse në ndeshjet më të lehta Shiko Milanin në Itali, humbi me Fiorentinën e 4-ta nga fundi, që nuk bënte kurrë rezultat në transfertë dhe rrezikon të humbë kampionatin, për një ndeshje të humbur në shtëpi kundër një skuadre të fundit të renditjes.

- Përsa i përket lojtarëve shqiptarë, a ka ndonjë mesazh nga ju se dyert e kombëtares janë të hapura?

- E kam thënë nga dita e parë. Për mua dyert e kombëtares nuk janë të mbyllura, por tërësisht të hapura dhe jam i disponueshëm të thërras në kombëtare të gjithë lojtarët që meritojnë të jenë pjesë. Jam i interesuar në kampionatin shqiptar. Ndjek të gjithë lojtarët këtu. I ndjek kur mundem nga afër, kur nuk mundem kam dekoderin.

- Ndonjë emër i ri?

- Të shtunën pashë një lojtar që më pëlqeu shumë. Nuk bëri asgjë në pjesën e parë të ndeshjes, në të dytën ishte, sipas meje, vendimtar. Flas për një lojtar të Skënderbeut. Nuk mund ta them emrin por ishte numri 9.