Nxënësit vjedhin zyrën e drejtorit

Katër nxënës në fshatin Baban të Rrethit të Devollit vjedhin kompjuterin e shkollës, por kapen nga policia. Nxënësit që mësonin në shkollën nëntëvjeçare, "Fuat Babani", kanë hyrë natën në ambientet e shkollës dhe pasi kanë thyer dyert, kanë vjedhur një kompjuter dhe aksesorët që ndodheshin në zyrën e drejtorit. Por aventura e katër nxënësve ka marrë fund shpejt, kur në banesat e tyre është ushtruar kontroll nga ana e policisë. Burimet e policisë së Devollit saktësuan se autorë të kësaj ngjarjeje janë adoleshentët me iniciale K.A., M.A., I.H. dhe E.K., të katërt nxënës të shkollës me moshë nga 13 në 15 vjeç.