ORA vendosë t'i bashkohet LDK-së

Partia Reformiste ORA ka vendosur t'i bashkohet Lidhjes Demokratike të Kosovës. Vendimi është marrë në Kuvendin e punës të Partisë ORA, pothuajse unanimisht.

Kryetarja e partisë, Teuta Sahatçija, tha se disponimi i të gjitha degëve ka ekzistuar për t'iu bashkuar LDK-së, përjashto dy degë (Gjilan e Gjakovë), që kanë dalë kundër. Sipas saj, në këtë kuvend ka pasur shumë propozime, por në fund me shumicë është vendosur që ORA t'i bashkohet LDK-së.

"Ka pasur konsultime edhe me herët për një bashkim të mundshëm me LDK-në. Nga ky subjekt ka mirëkuptim për një gjë të tillë", është shprehur Sahatçija.

Ajo ka theksuar se gjatë ditëve të ardhshme do të formohet një komision, i cili do të konsultohet me LDK-në për mundësinë e bashkimit.