OSBE/ODIHR, misioni që do të vëzhgojë zgjedhjet
Një numër prej 30 vëzhguesish të OSBE/ODIHR-it zbarkuan dje në Rinas, të cilët do të nisin menjëherë punën në Shqipëri për vëzhgimin e situatës parazgjedhore në vend. OSBE/ODIHR publikoi dje listën e diplomatëve të cilët do të vëzhgojnë zgjedhjet parlamentare të 28 qershorit. Në faqen zyrtare të misionit, u bë e ditur se misioni në Shqipëri, i cili pritet të ketë një numër rekord vëzhguesish, do të drejtohet nga ambasadorja britanike, Audrey Glover. Mësohet se një numër i konsiderueshëm vëzhguesish do të vijnë javën e ardhshme. Numri dy i misionit do të jetë gjermani Stefan Krause. Drejtuesit e këtij misioni janë nga diplomatët më me përvojë në fushën e vëzhgimit të zgjedhjeve, kryesisht në vendet e Ballkanit. Por lista e gjatë e vëzhguesve ka edhe ekspertë dhe diplomatë të tjetër me emër. OSBE/ODIHR ka vendosur që në Shqipëri të vijnë disa nga ekspertët më të njohur në këtë fushë, si analistë të çështjeve zgjedhore, analistë politikë, analistë mediatikë, koordinatorë të ndryshëm, ekspertë sigurie, financash dhe veprimi në terren. Një tjetër detaj që të bie në sy, është kombësia e misionit. Ekspertët dhe drejtuesit e misionit janë shtetas perëndimorë, amerikanë, por edhe nga vende të Lindjes.
Drejtuesit e misionit
Drejtuesi Audrey Glover Angli
Zëvendësi Stefan Krause Gjermani
Analiste ligjore Marianna Skopa Greqi
Analist zgjedhjesh Dimitar Dimitrov Bullgari
Analist zgjedhjesh Ovidiu Craiu Rumani
Analist politik Peter Palmer Angli
Koordinatore Polyna Lemos Greqi
Analiste mediatike Elma Sehalic Gjermani
Analiste e përgj. Linda Edgeëorth SHBA
Ekspert statistike Anders Eriksson Suedi
Koordinator prokurimi Pawel Jurczak Poloni
Ekspert veprimi Igor Bulic Kroaci
Ekspert sigurie Trevor Harvey Angli
Ekspert finance Tomazs Janczy Poloni
Zgjedhjet, KQZ-ja ndan sot lekët për partitë
Komisioni Qendror i Zgjedhjeve miraton sot procedurën dhe rregullat për shpërndarjen e fondeve nga buxheti i shtetit për partitë politike. Udhëzimi përkatës përcakton formën dhe mënyrën e ndarjes së fondit. KQZ-ja me vendim cakton sasinë e fondeve që do të marrë secila prej partive politike që plotëson kushtet e përcaktuara në gërmën “a” të pikës 2 të nenit 87 të Kodit Zgjedhor, pra të jetë regjistruar si subjekt zgjedhor, të ketë mandate në Kuvend dhe të ketë regjistruar listat shumemërore për zgjedhjet për Kuvendin 2009. Kështu, rregulli thotë se 50 për qind e fondit publik të vënë në dispozicion për subjektet zgjedhore pjesëtohet me shumën e mandateve të fituara në zgjedhjet pararendëse nga partitë politike të përcaktuara në këtë nen, sipas vendimit të KQZ-së për shpalljen e rezultatit përfundimtar të zgjedhjeve 2005.
Fushë-Arrëz, Topalli: Votoni projektin tonë
Kryetarja e Kuvendit vazhdon turin e saj në zonat e largëta të vendit, ku dje u ndal në Fushë-Arrëz. Përpara banorëve, Topalli evidentoi investimet në këtë zonë, të cilat kapin shifrën e 800 milionë lekëve të buxhetit të shtetit. Topalli tha se qeveria e Sali Berishës mbajti premtimet dhe kërkoi votën për projektin e katër viteve në vijim. “Kjo është Shqipëria e re. Kjo është Shqipëria e ndryshuar. Nuk ka ndjesi më të fuqishme, nuk ka krenari më të madhe, nuk ka siguri më të fortë sesa të shikosh në sy çdo qytetar, qytetare, kudo që janë në çdo fshat, në çdo komunë, në veri apo në jug, në lindje apo në perëndim dhe t’i thuash që unë e mbaj fjalën, unë e mbaj premtimin. Sali Berisha e mban fjalën, Sali Berisha e mban premtimin”, - deklaroi Topalli. Ajo tha më tej se në mandatin e ardhshëm, PD-ja do të ndryshojë më tej Shqipërinë. “Unë, Jozefina Topalli, ju premtoj sot të gjithë ju burrave edhe grave se shumë më tepër investime do të ketë për Fushë-Arrëzin në mandatin e dytë të PD-së. Mbajeni mend, po të doni mbajeni edhe shënim: Fushë-Arrëzi do të ketë shumë më tepër investime në mandatin e dytë dhe ne fjalën e mbajmë dhe premtimet i kthejmë në realitet”, - deklaroi znj. Topalli.