Obama zbut tonet ndaj Kubës dhe Venezuelës
Presidenti amerikan, Barack Obama, dëshiron të fillojë një kapitull të ri në marrëdhëniet e SHBA-së me vendet e Amerikës Latine.
Në fillim të samitit të 5-të të vendeve amerikane, OAS, në Port of Spain, kryeqytetin e Trinidad dhe Tobagos, Obama tha para më shumë se 30 kryetarëve dhe kryeministrave, se ai përpiqet të vendosë partneritet në bazë të bashkëpunimit. Kanë kaluar kohërat kur SHBA-ja besonte se mund t`i diktonte të tjerët. Edhe me Kubën SHBA-ja kërkon të fillojë raporte të reja. Edhe Presidenti Raul Castro u shpreh i gatshëm për një fillim të ri në raport me Uashingtonin.
Në samitin e 5-të të vendeve amerikane, OAS, në Port of Spain, kryeqytetin e Trinidad dhe Tobagos, marrin pjesë 30 kryetarë dhe kryeministra të vendeve amerikano-latine.
Në hapje të konferencës u zhvillua edhe takimi i parë midis Obama-s dhe Presidentit të Venezuelës, Hugo Chavez, i njohur si kritik i ashpër i SHBA-së. Chavez tha në këtë takim se shpreson përmirësimin e marrëdhënieve. Kuba komuniste është vendi i vetëm i kontinentit që nuk merr pjesë në takimin e nivelit të lartë.
Shtetet e Bashkuara të Amerikës duan të rifillojnë marrëdhëniet diplomatike, të ndërprera vitin e kaluar edhe me Venezuelën. Presidenti i Venezuelës Hugo Chavez, paralajmëroi se do të dërgojë si ambasador në Shtetet e Bashkuara të Amerikës ish-ministrin e Jashtëm, Roy Chaderton dhe do të normalizojë marrëdhëniet mes dy vendeve. Edhe Presidenti amerikan, Barack Obama, u shpreh se dëshiron të fillojë një kapitull të ri në marrëdhëniet me vendet e kontinentit amerikan.
Në samitin e 5-të të vendeve amerikane, OAS, në Port of Spain, Obama tha se kanë kaluar kohërat kur SHBA-ja besonte se mund t`i diktonte të tjerët
Në fjalimin e mbajtur në samit Obama, premtoi partneritet të barabartë me këto vende. "Unë ju premtoj se ne do të angazhohemi për një partneritet të barabartë. Nuk do të ketë partnerë kryesorë dhe dytësorë në marrëdhëniet tona. Ky është thjesht një angazhim që bazohet në respektin reciprok, interesat dhe vlerat e përbashkëta. Unë jam këtu, që të hapim një kapitull të ri angazhimi, të cilin do ta mbajmë në fuqi gjatë tërë kohës së administratës sime", - tha Obama.