Opozita, sërish bllokadë parlamentare kundër reformave të BE

Kryeministri Sali Berisha fton opozitën për hartimin e një rezolute për integrimin e vendit, por Gramoz Ruçi, i fundit ministër i brendshëm i Sigurimit, deklaron në emër të PS-së, se s’do të ketë votë “pro” as me kursin e ri të Edi Ramës

Kryeministri Sali Berisha i bëri opozitës thirrje dje, që së bashku, të dy palët të hartojnë një rezolutë, në të cilën të shprehen zotimet dhe axhenda konkrete e hapave të mëtejshëm në procesin e integrimit europian.
Thirrjen e tij ndaj opozitës, Kryeministri Berisha i drejtoi gjatë seancës parlamentare. Duke ju drejtuar opozitës Kryeministri kërkoi nga ajo që “të angazhohet për të hartuar së bashku me mazhorancën një rezolutë në të cilën, të shprehen zotimet në shërbim të axhendës politike për procesin e integrimit europian të vendit”.
Gjatë fjalës së tij në Kuvend, Kryeministri shprehu mirënjohjen për vizitën e dy ditëve më parë në vendin tonë të ministrave të jashtëm të Italisë dhe Greqisë, ndërsa ritheksoi mesazhin e tyre që të mos bllokohet procesi i integrimit europian të Shqipërisë.
“Jam sot, këtu, për të shprehur mirënjohjen e thellë të qeverisë shqiptare dhe mazhorancës ndaj dy miqve që erdhën dje (pardje) në Shqipëri, me qëllimet më miqësore ndaj këtij vendi, përfaqësuesve të dy vendeve që në këto 20 vite kanë dhënë një kontribut të madh dhe mbështetje të gjithanshme Shqipërisë dhe shqiptarëve, por njëkohësisht, dy ministrat e Jashtëm, të Republikës italiane dhe Republikës helene erdhën si përfaqësues të Këshillit të Ministrave të Bashkimit Europian. Miqtë tanë, të cilët shprehën para shqiptarëve qëllimin e vizitës së tyre, kërkonin që këtu të mos bllokohet më tutje procesi i integrimit. Ata erdhën në një kohë kur forcat politike, me deklaratat e tyre, kanë pohuar se do të punojnë me përkushtim për integrimin e vendit. Ata erdhën në një kohë kritike, në çastet më të fundit, në mënyrë që ky proces të mund të ndihmohet”, tha Berisha.
Duke ftuar opozitën për miratimin e kësaj rezolute, Berisha tha se, “Unë jam sot, këtu, për t’i bërë thirrje opozitës që së bashku të hartojmë një rezolutë, në të cilën të shprehim zotimet dhe axhendën tonë për procesin e integrimit”.
Kryeministri Sali Berisha garantoi selinë rozë se mazhoranca qeverisëse, do të respektojë opozitën bazuar në ligjet dhe Kushtetutën e vendit.
“Pavarësisht nga skepticizmat, besoj se qëndrimet e veta, opozita nuk i merr dhe nuk i përcakton për hir të qeverisë. Qëndrimet e veta, opozita i bazon dhe duhet t’i bazojë në programin e saj si forcë politike, i bazon dhe duhet t’i bazojë në funksion të realizimit të qëllimeve të saj dhe kjo është normale. Tani është momenti që të faktojmë se deklaratat tuaja se do votoni të gjitha çështjet që lidhen me integrimin janë të vërteta dhe reale, apo janë një blof i radhës, me të cilin kërkohet vetëm një gjë, të blihet kohë, me të cilin kërkohet vetëm një gjë, të mund t’u hidhet hi syve shqiptarëve se ‘ne po themi se do votojmë, por nuk do votojmë dhe ne nuk po pengojmë’”, tha Berisha.
Sipas tij, “në rrafshin politik ky qëndrim do të ndëshkonte çdo shqiptar, por do të ndëshkonte në mënyrë të parikthyeshme autorët e tij”.
Kryeministri siguroi mazhorancën se Kuvendi nuk do të kthehet në një shesh pazari  në pazare dhe nuk do të vendosen kushte.
“I kam ndjekur deklaratat në gjithë këto ditë e javë dhe ajo që më bën përshtypje është ideja se mund ta bëjnë parlamentin, shesh pazaresh. Unë ju garantoj se do të keni respektin më të plotë nga kjo mazhorancë. I tërë ky respekt do të bazohet në ligjin dhe Kushtetutën e vendit, do bazohet jo në pazare dhe jo në kushte. Ne nuk ju vendosim asnjë kusht. Unë ju siguroj se sa të jem në qeveri, nuk do të keni kurrë kushte nga kjo qeveri, por përpjekjet për të vendosur kushte ndaj saj, nuk janë gjë tjetër veçse atavizma që janë faktuar në qindra raste të pasuksesshme, të çdo forme që ato janë ndërmarrë. A doni të bashkëpunojmë? Jeni të mirëpritur. A doni të japim një sinjal, sepse u kthyet në  parlament dhe mirë bëtë, zutë vendet tuaja të punës e deklaruat se do të votojmë? Atëherë urdhëroni, por sot kërkuat tërheqjen e ligjit për Gjykatën Administrative. Dakord, por e keni e votuar në komision me të gjitha votat dhe janë procesverbalet, por nuk ka rëndësi, shqyrtojeni sërish. Dhe shqyrtoni çdo ligj. Por ka dy gjëra. Kalendat greke, çdo shqiptar do t’i quajë si blofin e radhës. Ministri grek dhe ai italian erdhën si dy miq, me ndjenjat më miqësore, për të na ndihmuar dhe është në traditën e mikpritësit për të bërë një gjest dhe na takon neve të bëjmë një gjest që, pavarësisht se çfarë efektesh mund të ketë, të paktën të dëshmojmë një ndjenjë mirënjohjeje për aktin e tyre. Ndaj është më mirë që dy përfaqësitë e grupeve të ulen të hartojnë një rezolutë për integrimin, të çojmë këtë mesazh drejt Brukselit”, tha ai.
Kryeministri Slai Berisha, ripërsërit edhe një herë apelin, sipas të cilit bllokimi i procesit të integrimit, është në dëm të popullin dhe jo të qeverisë, ndërsa rikonfrimoi se mbeten tërësisht të hapur për bashkëpunim.
“Zotërinj, në qoftë se mendohet se duke bllokuar procesin e integrimit dëmtohet qeveria, absolutisht jo, dëmtohen qytetarët shqiptarë para së gjithash dhe më shumë se të gjithë, ata që bllokojnë, sepse qeveria ka të gjitha mjetet për të faktuar se ajo  ka bërë e do të bëjë çdo gjë që ka në dorë për këtë proces, siç bëri për vizat, një proces që nuk kërkonte ligje me tre të pestat, por bëri gjithçka. Nuk ka gjë më të rëndësishme se njeriu të lexojë e analizojë veprimet e veta. E gjithë përpjekja që u bë për të penguar vizat duhet të krijojë tek çdo njeri një brejtje ndërgjegjeje, e cila mund të dëshmohet se po korrigjohet me një qëndrim të ri ndaj procesit të integrimit, në interes të fëmijëve e të rinjve të këtij vendi, burrave, grave e të moshuarve të këtij vendi,  zgjedhësve të të gjitha ngjyrave. Ne mbetemi plotësisht të hapur”, u shpreh Berisha.
Gjithashtu, Kryeministri ftoi opozitën që të paraqesë në Kuvend kandidaturën për Avokatin e Popullit, ndërsa siguroi se mazhoranca nuk do të sjellë asnjë kandidaturë për këtë post, duke ia lënë atë opozitës.
“Ju keni kërkuar mbledhjen e Komitetit të Integrimit për të shqyrtuar strategjinë. Ju përgëzoj. Strategjia është gati, shqyrtojeni dhe sugjeroni të gjitha problemet që doni. Kryetari juaj ka ngarkuar dy deputetë tuaj për të eksploruar Komitetin Ad hock. Ejani ta eksplorojmë bashkërisht, të ngarkojmë edhe ne dy deputetë e të eksplorojmë modalitetet e ngritjes dhe funksionimit të Komitetit Ad hock...”, përfudoi mesazhin e tij Kryemsitri Sali Berisha.