PS: KRRTRSH, vendime korruptive për gjelbërimin e Tiranës

 

Deputeti socialist i qarkut të Tiranës, Eduard Shalësi akuzoi dje kryeministrin Berisha për vendimmarrje korruptive në dëm të gjelbërimit të kryeqytetit. “Disa ditë më parë, KRRTRSH e kryesuar nga Sali Berisha, ka miratuar një seri vendimesh që tregojnë qartazi, se në themel të tyre nuk qëndrojnë arsye që kanë të bëjnë me zhvillimin e qëndrueshëm të rrethinave të Tiranës, por qëllime të cilat mpleksin dukshëm vizionin e cungët të Sali Berishës me interesat private të oborrit të tij.
Nga njëra anë, Sali Berisha zotohet për ullishtet dhe nga ana tjetër, me vepra me një të rënë të lapsit, zhduk plot 75 ha gjelbërim dhe ullishte në zonën e Farkës”, u shpreh Shalësi gjatë një konference për shtyp në selinë rozë. Sipas tij, në planin e përgjithshëm rregullues të Tiranës, zona përreth liqenit të Farkës parashikohet të jetë një zonë ekologjike e mbrojtur me ligj dhe me territore të rezervuara për hapësira publike dhe rekreative, ndërkohë që vendimi i Sali Berishës për ta shndërruar në një territor urban, sjell zhvillime me pasoja negative dhe mbi të gjitha shkatërrimin e një parku dhe të një kurore të gjelbër, që janë një pasuri brezash për qytetarët. “Kemi denoncuar me indinjatë masakrat urbane në rrëzë të malit të Dajtit, ato të kodrave të liqenit, si dhe ato të Kasharit. Sot denoncojmë me po aq indinjatë vendimin e Sali Berishës për të kasharizuar edhe këtë pjesë të Farkës, e cila duhet të ishte një park dhe një model zhvillimi i koordinuar dhe integruar me qytetin e Tiranës.
I bëjmë thirrje Sali Berishës të reflektojë dhe rishikojë një vendim me pasoja shkatërrimtare për të ardhmen e këtij territori”, u shpreh Shalësi.