PS: Nuk votojmë asnjë ligj në Kuvend

Partia Socialiste vendos të bojkotojë vendimmarrjen parlamentare për të gjitha ligjet që pritet të diskutohen në seancat plenare të mbetura deri në mbyllje të këtij sesioni. I mbledhur dje në mbledhjen e zakonshme javore, grupi parlamentar i saj, ka diskutuar situatën e tanishme politike duke dalë në konkluzionin se përshkallëzimi i sjelljes së qeverisë dikton kalimin në marrëdhënie të kushtëzuara me Parlamentin, e cila kësaj radhe do të manifestohet përmes refuzimit të miratimit të ligjeve përmes mospjesëmarrjes në votime. Kjo është bërë publike nga kreu i tij, Gramoz Ruçi, i cili në një deklaratë për shtyp pas mbledhjes ka shpalosur atë që mund të quhet kursi i ri opozitar në Parlament. “Duke filluar që nga dita e nesërme, grupi parlamentar socialist përshkallëzon marrëdhënien me Parlamentin shqiptar, duke kushtëzuar marrëdhëniet ndaj këtij Parlamenti, duke mos votuar asnjë ligj, as me shumicë të thjeshtë e as me shumicë të cilësuar”, deklaroi Ruçi. Thënë ndryshe, opozita bojkoton reformat në vend, duke refuzuar të japë konsensusin e nevojshëm për to, i kërkuar edhe para disa ditësh nga Kryeministri Sali Berisha. Në një plan më të gjerë, qëndrimi i adoptuar nga selia rozë, që pason shurdhërinë e qeverisë për sa i përket kërkesës për transparencën e 28 qershorit, e mban të gjallë krizën politike, e cila me afrimin e vjeshtës ripërmasohet në kufijtë e kriterit të integrimit të vendit. Për këtë arsye edhe dalja e PS me këtë axhendë të re parlamentare, që e rrit presionin politik përmes formalizmit të prezencës në sallë, është një taktikë e fundit e saj përballë shumicës në pushtet, e cila nuk pranon asnjë prej kërkesave opozitare. Në kontekstin e klimës elektorale që pritet të mbërrijë me sesionin e ri parlamentar në shtator, Ruçi nuk ka munguar të paralajmërojë përshkallëzim të ri të aksionit opozitar, i cili nuk neglizhon as rifillimin e protestave. “Grupi parlamentar do të përgatisë gjatë ditëve në vazhdim axhendën e tij opozitare në marrëdhënie me Parlamentin. Lidhur me hapat e mëtejshëm, grupi parlamentar socialist në sesionin e ardhshëm, apo të ri parlamentar që fillon në shtator, do të bëjë publikë hapat e mëtejshëm lidhur me marrëdhëniet dhe me qëndrimin ndaj Parlamentit shqiptar”, tha Ruçi. Nga këto fjalë kuptohet se kriza politike edhe pse do të pushojë mediatikisht së bashku me pushimet e verës, do të rishfaqet në vjeshtë për t’u futur në një gjatësi vale me emocionet e zgjedhjeve lokale që mbahen në fillim të vitit tjetër. Artikulimi i këtij qëndrimi në fakt ka kaluar përmes diskutimeve të ndryshme në mbledhjen e djeshme, e cila ka pasur si pikë qendrore të vetën adaptimin ose jo të bojkotit. Të pajtuar në idenë e mbajtjes në axhendë të protestave, deputetët socialistë në përgjithësi kanë pasur mendime të ndryshme për sa i përket braktisjes së punimeve të Parlamentit, që me deklarimin e Ruçit duket të ketë gjetur një rrugë më të ekuilibruar. Kështu, burime nga mbledhja bënë të ditur se ekipi i deputetëve më të rinj, kanë shprehur idenë e radikalizmit të menjëhershëm, me të njëjtën gjuhë me atë të shprehur pak ditë më parë nga Blendi Klosi. Por nuk ka munguar as ideja e një politike të kombinuar të shprehur në pjesëmarrje parlamentare dhe protesta, çka do të maksimalizonte rezultatin politik të PS dhe opozitës në tërësi. Protagonist i forcimit të rrugës parlamentare ka qenë nënkryetari Erjon Braçe, i cili ka kërkuar që politika e bojkotit të braktiset për t’i lënë vend angazhimit në debatin institucional dhe ndoshta ndërthurjes me protesta. Qëndrimit të tij i janë bashkuar shumica e deputetëve të cilët kanë mbështetur një kurs të tillë, i cili më së shumti duhet thënë se kundërshtohet nga protagonistët e grevës së urisë, që u regjistrua si aksioni më radikal i opozitës socialiste.