PS denoncon INSTAT se shmangu inflacionin e ushqimeve

Partia Socialiste akuzoi dje Institutin e Statistikave për manipulimin që i bën të vërtetave të realitetit për të fshehur krizën ekonomike. Deputeti Ilir Beqja akuzoi INSTAT se përmes këtyre shifrave kërkon të fshehë krizën ekonomike në vend, ndërsa shtoi

se manipulimi më i madh është bërë me çmimet e ushqimeve, rritja e vlerës se të cilave sipas Beqës është paraqitur më i vogël nga sa është në realitet. Sipas PS-së peshat e artikujve  janë llogaritur  bazuar në rezultatet e Anketës së Buxhetit të Familjes, realizuar nga INSTAT gjatë periudhës Tetor 2006 - Shtator 2007. Për vetë rëndësinë që ka inflacioni për kuadrin makroekonomik të vendit si dhe për buxhetet familjare, njësitë kërkimore në Partinë Socialiste e ndjekin me vëmendje inflacionin duke nënvizuar me shqetësim manipulimin me të nga ana e INSTAT. Në reagimin e saj PS pohon se Institucioni që ditën e shtunë u përbetua publikisht për profesionalizëm, është tërësisht i çoroditur nën presionin e vijueshëm për ti bërë qeverisë shërbime që bien ndesh me çdo sens e vlerë profesionale. Partia socialiste pretendon se shmangia më e madhe konstatohet tek Ushqimet. Kështu, Ushqimet, të cilat në realitetin ku ne jetojmë janë shtrenjtuar 20 30 %, në llogaritjen e inflacionit kanë një peshë specifike më të vogël se sa gjetjet e rezultateve të Anketës. Sipas PS-së inflacioni është një element thelbësor në hartimin  e politikave fiskale dhe monetare të çdo vendi. Partia Socialiste është e vendosur të tregojë të vërtetën e inflacionit në Shqipëri, atë të vërtetë që familjet shqiptare e jetojnë përditë pavarësisht fshehjes së përsëritur që i bën INSTAT-i, praktikisht Televizioni Shtetëror i Shifrave të qeverisë.

Last Updated on E Merkure, 17 Mars 2010 22:55