“PS-ja bëri autogol, Edi Rama kërkon të mbajë peng stabilitetin dhe të ardhmen e Shqipërisë”

Projektligjet e depozituara në Kuvend, reagojnë juristët e PS

Autogol politike e konsideron anëtari i Asamblesë socialiste Ylli Manjani draftin e depozituar nga selia rozë për hapjen e kutive dhe kjo pas 6 muaj që kryesocialisti kishte këmbëngulur se këtë kërkesë e kishte të bazuar në ligj. “Projektligji për mua kishte dy probleme; politikisht është një autogol i mirëfilltë që PS bën në raport me kërkesën e saj për hapjen e kutive që ka bërë këto 6 muaj. Pra, me këtë projektligj PS po u thotë shqiptarëve që kërkesa për hapjen e kutive dhe hetimin e zgjedhjeve e paska pas të pambështetur në ligj. Kjo është arsyeja që u dashka bërë një ligj i ri. Theksova se politikisht ky është një autogol i paparashikuar për Partinë Socialiste”, u shpreh juristi Ylli Manjani.
Ai shton se drafti që është depozituar në Kuvend, nuk është konsultuar me forumet e partisë, krijon destabilitet nëse do të hyjë në fuqi siç kërkojnë socialistët.
“është një precedent i rrezikshëm për shtetin ligjor dhe demokracinë sepse sipas këtij projektligji, sipas idesë që ka Edi Rama dhe grupi i tij i ngushtë në drejtimin e Partisë Socialiste, proceset zgjedhore nuk duhen mbyllur asnjëherë. I bie që proceset zgjedhore të mos mbyllen pafundësisht dhe të hapen dhe të zgjaten pafundësisht. Pra, edhe kur i mbyll KQZ-ja, i hap parlamenti dhe kjo është një projektligj që nuk krijon aspak ndjenjën e stabilitetit, as ndjesinë e sundimit të ligjit në këtë vend, por mban peng demokracinë, mban peng stabilitetin, mban peng qeverisjen dhe mban peng të gjithë shqiptarët”, deklaroi më tej, juristi socialist Ylli Manjani.