Papandreu: Zgjedhjet në Greqi, në vitin 2013

Masat e reja financiare shkaktuan reagime edhe në grupin parlamentar të partisë në pushtet në Greqi, PASOK. Në mbledhjen e komisionit Parlamentar të Financave, deputetët kritikuan qeverinë për paaftësi dhe për dështime në punën e saj, duke e fajësuar se për 2 vjet nuk bëri asnjë privatizim.

Madje, shumë deputetë thanë hapur se kjo situatë nuk mund të vazhdojë më dhe kërkuan zhvillimin e zgjedhjeve të parakohshme ose edhe një qeveri koalicioni, duke iu shtuar kështu zërave të 3 ministrave të qeverisë, të cilët disa ditë më parë kërkuan në mbledhje qeverie të konsiderohej opsioni i zgjedhjeve të parakohshme.

Kryeministri grek, George Papandreu, iu dha përgjigje qëndrimeve që mbështesin zhvillimin e zgjedhjeve të parakohshme në vend, gjatë takimeve që po zhvillon me anëtarë të PASOK-ut nga i gjithë vendi.

Papandreu e përjashtoi këtë mundësi, duke theksuar se “Nuk ndihmon kultura e thashethemeve dhe skenarët që kanë të bëjnë me zgjedhjet”.

“Zgjedhjet do të ishin një fatkeqësi për vendin. Ato do të mbahen në vitin 2013", tha Papandreu.