Patozi: Zgjedhjet e 2009-s, tashmë të garantuara

Pas miratimit në Komisionin e Ligjeve të kodit zgjedhor, PD-ja nuk sheh asnjë pengesë për garantimin e zgjedhjeve të lira dhe të ndershme në 2009-n. Sipas demokratëve, tashmë është i garantuar një proces zgjedhor në përputhje me standardet evropiane. Kryetari i grupit parlamentar të Partisë Demokratike, Astrit Patozi, përshëndeti dje miratimin e ndryshimeve në Kodin Elektoral, të cilat sipas tij, "i hapin rrugën reformës zgjedhore, që është elementi më i rëndësishëm për të garantuar zgjedhje të lira dhe të ndershme në Shqipëri". Patozi shprehu vlerësimin maksimal për Komisionin e Reformës Zgjedhore, i cili arriti të miratojë dy ditë më parë ndryshimet e nevojshme, duke bërë gati për seancë Kodin Elektoral, pas kthimit të tij në Kuvend nga Presidenti i Republikës. "Pas kësaj nuk ka më asnjë pengesë për të finalizuar reformën zgjedhore. Për të arritur deri këtu nuk ka qenë e lehtë, por është dashur kontributi dhe përkushtimi i shumicës së aktorëve politikë në Parlament", - tha Patozi. Pavarësisht vonesës së krijuar, ai vuri në dukje se "tashmë jemi sërish në kohë për të pasur një proces të standardeve më të mira evropiane".