Pavarësia, Ambasada e Kosovës, pritje në Tiranë

Ambasada e Kosovës në Shqipëri me rastin e festës së njëvjetorit të pavarësisë së Kosovës organizoi mbrëmë në Pallatin e Kongreseve në Tiranë një pritje për autoritetet e larta të Republikës së Shqipërisë dhe përfaqësues të trupit diplomatik etj. Të ftuar ishin Presidenti i Republikës, Bamir Topi, kryetarja e Kuvendit, Jozefina Topalli, Kryeministri Sali Berisha, ministra, Ambasadori i SHBA-së në Tiranë, John L. Withers, përfaqësues të trupit diplomatik të akredituar në Tiranë etj. Ambasadori i Kosovës në Tiranë, Gazmend Pulaj, vuri në dukje arritjet e popullit të Kosovës, për të arritur në këtë ditë të shënuar. "Pavarësinë e Kosovës e kanë njohur shtete anembanë botës dhe shumë shpejt do të ketë njohje të reja", - theksoi ambasadori i Kosovës në Tiranë. Duke uruar popullin kosovar në këtë ditë, Presidenti i Republikës së Shqipërisë, Bamir Topi, shprehu bindjen se Kosova do të bëhet shtet i barabartë mes të barabartëve. Kurse Kryeministri Sali Berisha vlerësoi progresin e Kosovës përgjatë një viti në rrugën e ndërtimit si shtet sovran dhe i lirë. Në përshëndetjen e tij, ambasadori i SHBA-së në Tiranë, John L. Withers, tha se "një vit më parë Kosova ishte një zog në kafaz, që vetëm mund të këndonte, tani ai zog është i lirë, Kosova është vendi i njerëzve të lirë". Ambasadori Withers konfirmoi se "populli amerikan do t'i qëndrojë përkrah popullit të Kosovës gjatë gjithë procesit për integrim në BE dhe NATO".