Pay Tv, hetimi shtrihet në disa qytete

Krahas Prokurorisë së Tiranës, edhe Durrësi e Elbasani verifikim ndërhyrjeve në platformat dixhitale

Prokuroria shqiptare shtrin hetimet në disa qytete për ndërhyrjet në platformat dixhitale, duke u vjedhur këtyre të fundit pamjet vizive, ndërsa 11 të pandehur të tjerë janë dërguar në Gjykatën e Tiranës. Mësohet se procedimi penal që ndodhej në prokurorinë e kryeqytetit është ndarë dhe janë dërguar disa të pandehur në akuzën e Durrësit dhe Elbasanit. Dyshohet se grupi që ndërhynte në valët e platformave dixhitale e kryente aktivitetin e paligjshëm në disa qytete dhe më të prekura ishin pikërisht qytetet e mëdha, ndërsa nuk përjashtohen rrethet e tjera. Burime nga akuza qendrore thanë se hetimi në Durrës po kryhet për futjen e disa aparateve “Dreambox” kontrabandë dhe pa paguar taksa, ndërsa në Elbasan janë dërguar disa të akuzuar, pasi ndërhynin në valët e platformave dixhitale, duke u shkaktuar këtyre të fundit një dëm të madh ekonomik dhe si rrjedhojë shteti pësonte të njëjtin fat nga vjelja e të ardhurave nga fitimet.

Hetimet

Dosja e Prokurorisë së Tiranës ka mbërritur në gjykatë me 11 persona të pandehur të akuzuar për mashtrim kompjuterik, moskallëzim krimi dhe kontrabandë. Nga materiali i referuar rezulton se veprat penale të mësipërme dyshohet se janë kryer nëpërmjet thyerjes së kodeve të sigurisë të vendosura nga kompania “DigitAlb” në kartat e veta SMART dhe shpërndarjen e paligjshme të këtij informacioni të kartave që nënkupton programe televizive te pajtimtarët. Sipas akuzës, e tërë veprimtaria ushtrohet në mënyrë të kundërligjshme përmes thyerjes së kodeve/çelësave të sigurisë, merret dhe shpërndahet nëpërmjet internetit kundrejt pagesës një program televiziv që, në kuptim të ligjit, nuk është pronë e këtyre personave që e shpërndajnë, por e vetë “DigitAlb”. Kjo veprimtari, sipas akuzës, sjell jo vetëm përfitim të paligjshëm gjithashtu dhe të palicencuar dhe të pataksuar, por sjell një dëm të konsiderueshëm financiar për vetë kompaninë e licencuar, si dhe dëm ekonomik për shtetin që nuk vjel tatime mbi të ardhurat e këtyre personave që janë të paligjshme, si dhe në formën e rënies së të ardhurave të kompanisë që sjell pagesë më të vogël për tatimet.

Përfitimi

Prokuroria ka sqaruar edhe mënyrën sesi operojnë të dyshuarit për këtë veprimtari, ndërsa ka sqaruar interpretimin e veprave penale për të cilat po kryhen hetime. “Aparati ‘Dreambox’ funksionon në një mënyrë normale, pra duke përdorur një kartë SMART të abonuar e në këtë formë është në gjendje të dekriptojë ‘çelësin’. Më tej kjo pajisje lidhet me internetin duke bërë të mundur në këtë mënyrë ndarjen e ‘çelësit, kodeve’, në të gjitha aparatet e tjera, të cilët nuk përdorin kartën ‘Smart’. Në momentin që klienti merr aparatin ‘Dreambox’ të cilin po e quajmë klient, pasi lidhet me sinjalin e internetit, merr çdo të dhënë kodesh nga ‘Dreambox’ serveri dhe kështu përftohet pamja vizive”, sqaron akuza mënyrën e përdorimit nga ana e të pandehurve. Sipas tyre, nga të dhënat teknike të administruara nga kompania “Conax” e cila furnizon me pajisjet përkatëse atë të “Digitalb” karta SMART, e cila shfrytëzohet në mënyrë të kundërligjshme nga të dyshuarit, është pjesë përbërëse e sistemit kompjuterik.

#