Pensionet rritje 3-5 %, pagat indeksohen

Rrudhen ritmet e rritjes së pagave dhe pensioneve në vitin 2012. Sipas planifikimeve paraprake në projektligjin financiar, pensionet e fshatit do rriten 5 për qind dhe të qytetit, 3 për qind. Pagat indeksohen me inflacionin. Ja fondet në dispozicion

Pagat dhe pensionet në vitin 2012 nuk do të kenë rritje reale, por vetëm do të indeksohen me inflacionin. Në një gjuhë më të thjeshtë do të thotë se, rritja nuk do të jetë më shumë se, 3-4 për qind aq sa do të jetë rritja e përgjithshme e çmimeve (inflacioni) deri në korrik 2012. Lajmin e bënë të ditur burimet në Ministrinë e Financave, të cilat pohuan se fondi shtesë për rritjen e pagave në dispozicion për vitin 2012 do të jetë rreth 1.8 miliardë lekë, i mjaftueshëm për një rritje jo më të lartë se tre për qind. Aktualisht buxheti i vitit që vjen është në fazën e diskutimeve me ministritë dhe institucionet buxhetore për ndarjen e fondeve. Ndërsa fondi shtesë për rritjen e pensioneve nuk do të jetë më shumë se 1.6 miliardë lekë. Këto fonde për rritjen e pagave dhe pensioneve që pritet të vërë në dispozicion buxheti i vitit që vjen, mjaftojnë vetëm për indeksim me inflacionin, pohuan të njëjtat burime. Kështu, pavarësisht debateve për linjën që do të mbahej në lidhje me mbajtjen në nivelet aktuale të borxhit publik dhe deficitit, pagat dhe pensionet do të rriten. Qeveria, edhe me buxhet nën presion, ka vendosur të rrisë pensionet si të fshatit, ashtu edhe të qytetit e gjithashtu pagat e administratës pavarësisht përqindjeve shumë të ulëta. Burime nga Financat deklaruan se, buxheti për vitin që vjen do të vërë në dispozicion të politikave të reja të pagave dhe pensioneve pak më shumë se, 3 miliardë lekë. Sipas Financave, rritja e pensioneve në përqindje do të jetë për pensionet e fshatit 5% dhe ato të qytetit 3 %. Rreth 1/3 e buxhetit të shtetit e përkthyer në 1 mld e 500 mln dollarë shkon për financimin e pensioneve. Ministri i Financave, Ridvan Bode ka bërë me dije se Shqipëria është vendi me faturën sociale më të lartë në rajon, për shkak të politikave shumë agresive që përdori qeveria, për të zbutur varfërinë në mandatin e shkuar por edhe në këtë që vijon. Duke marrë në konsideratë këtë fakt, burimet në ministrinë e Financave, sqarojnë se një pjesë e konsiderueshme e fondit të pagave dhe pensioneve për vitin që vjen do të gjenerohet nga reforma që do të aplikohet në administratën publike në fillim të vitit që vjen. Ministria e Financave ka dy vite që udhëheq reformën, e cila do të bëhet shpejt realitet dhe që ka në themel racionalizimin e fondeve publike. Sipas Ministrisë së Financave, kjo reformë do të bëhet për t’u vënë fre abuzimeve me fondin e pagave, që buxheti vë në dispozicion të institucioneve. Struktura e re parashikon shkrirje të drejtorive dhe sektorëve me funksione të ngjashme në shumë dikastere. Sipas dikasterit të Bodes, analiza e grupeve kryesore të shpenzimeve ka konkluduar në faktin se, pas reduktimit të ndjeshëm të shpenzimeve në zërat e tjerë si, ato administrativë, subvencione etj, kosto e personelit i është nënshtrohet një analize të thellë, shoqëruar me një reformë në sistemin e strukturave, organikave dhe të pagave. Afati i reformës është janari i 2012-ës, fiks koha që përkon me hyrjen në fuqi të buxhetit 2012. Për shkak se tashmë, gati 2 të tretat e buxhetit të shtetit përdoren për paga dhe pensione. Pas reformës në paga, Ministria e Financave pritet të marrë edhe një reformë për rishikimin e skemës së pensioneve, e cila është rekomanduar me urgjencë nga Banka e Botërore.

Rritja e pagave dhe pensioneve

Pensionet e fshatit 5 %

Pensionet e qytetit 3%

Pagat 2-4 %

Fondi për rritjen e pagave 1.9 miliardë lekë

Fondi për rritjen e pensioneve 1.6 miliardë lekë