Pepa: Godo po bën hapa prapa në përzgjedhjen e drejtuesve

Drejtimi në këto 15 muaj në krye të Qendrës Spitalore Universitare “Nënë Tereza” janë të suksesshme. Kështu u shpreh drejtori aktual i këtij spitali, Mati Pepa, i cili theksoi se nuk do të japë dorëheqjen nga posti i Drejtorit. Sipas tij, vetëm Kryeministri ka kompetenca ta shkarkojë atë nga detyra dhe askush tjetër. "Nuk kam asnjë kërkesë zyrtare për t’u larguar nga posti i Drejtorit të QSUT-së. Këtu më ka emëruar Kryeministri, ndaj, ai mund të më shkarkojë”,- thekson Pepa. Ndërkohë ai nuk i ka kursyer edhe pakënaqësitë që ka ndaj ministres së re të Shëndetësisë, Anila Godo. “Zëvendësimet që po u bën Anila Godo menaxherëve me mjekë, janë hap mbrapa në reformimin e Shëndetësisë. Spitalet kanë nevojë për administrim dhe këtë punë mund ta realizojnë vetëm menaxherët e mirëfilltë”,- thekson Pepa. Drejtori aktual nuk ka patur as mbështetjen e ish-ministrit të Shëndetësisë, Nard Ndoka, cili i ka kërkuar për muaj me radhë dorëheqjen, madje, Ndoka e cilësonte si ish-drejtor. Por sulmet e Ndokës, Mati Pepa, muaj më parë i cilësoi si sulme politike dhe që nuk kishin të bënin aspak me aftësitë profesionale të tij. Ndërsa për mangësitë e theksuara në medikamente dhe materiale të tjera tepër të domosdoshme për spitalin, duke e futur atë në një krizë totale, Pepa ka fajësuar gjithnjë Ministrinë e Shëndetësisë që nuk ka realizuar në kohë tenderat. I ndodhur përpara kërkesave të njëpasnjëshme për dorëheqje, Drejtori i QSUT-së, Pepa nuk i ka miratuar ato por ka vazhduar ritualin e tij si drejtues me takime dhe projekte.