Për Man Utd, Wembley më afër
Manchester United e ka bërë një hap të madh drejt finales së Wembleyt pasi e mposhti Schalken me rezultat 2:0, në ndeshjen e parë gjysmëfinale, e cila u zhvillua të martën mbrëma në Gjermani.
‘Djajtë e Kuq’ e kanë thënë fjalën kryesore në fushë, duke shënuar fitore mjaft të lehtë.
Epërsia e tyre ka mundur të jetë edhe më e lartë, por për të mos ndodhur kjo u përkujdes portieri vendës Manuel Neuer.
Djelmoshat e Sir Alex Ferguson kanë krijuar disa raste të mira në pjesën e parë, por nuk ia dolën të shënonin. Dominimi i tyre në fushë është shpërblyer në pjesën e dytë.
Goli i parë ka arritur në minutën e 67-të nga veterani Ryan Giggs, i cili e shfrytëzoi për mrekulli një asistim të Wayne Rooneyt.
Nuk kaluan mirë as dy minuta dhe gjiganti anglez e dyfishoi rezultatin. Një top i mirë nga Javier Hernandez (Chicharito) u shndërrua në gol nga Rooney. Pas shënimit të këtyre golave, ekipi gjerman kapitulloi dhe u dorëzua tërësisht.
Schalke nuk e pati ditën e vetë pasi nuk u tregua pothuajse fare e rrezikshme, siç veproi në çerekfinale ndaj kampionit të Evropës, Inter, ndaj së cilit shënonte 7 gola.
Kjo fitore i jep komoditet të madh Manchesterit, i cili në ndeshjen e kthimit do të ketë kapital prej dy golash. Pa dyshim, ky rezultat e afron Man Utd shumë më tepër drejt finales së Ligës së Kampionëve, por natyrisht, për t’u konfirmuar kjo, duhet pritur edhe lojën e kthimit, e cila do të zhvillohet pas një jave.
Liga e Kampionëve
Gjysmëfinalja
Schalke – Manchester United 0:2