Përgjigjja ime
Express: Nga pozicioni i Presidentit të Shtetit, si e shihni, sa mund të jetë i qëndrueshëm koalicioni mes AKR’së e PDK’së, kur zyrtarë të lartë të kësaj partie, z. Krasniqi, z. Limaj kanë qenë kundër zgjedhjes suaj?
Pacolli: Unë do të dërgoja një mesazh prej këtu, që të ketë bashkëpunim të mirë, që institucionet e Kosovës të veprojnë, të punojnë për interesat e qytetarëve. Çka mund të dalë nga ajo ana negative, unë nuk mund as ta paramendoj. Nuk më mbetet mua që të them sot se AKR’ja, PDK’ja kanë probleme. Kosovës i nevojiten institucionet.
Express: Të flasim rreth legalitetit të zgjedhjes suaj në krye të Presidencës. A mendoni që ju ndoshta vetë duhet të kërkoni sqarime prej Gjykatës Kushtetuese për atë që ka ndodhur?
Pacolli: Unë nuk konsideroj se duhet të kërkoj sqarime, për arsye se unë punoj sipas instinktit tim, veprimeve të mia që i kam bërë nga vullneti im, nga shpirti im. Çdo gjë që kam bërë deri tani, sidomos prej procesit parazgjedhor, i kam bërë gjithmonë në sensin pozitiv.
Express: Zgjedhja juaj President e ka përçarë skenën politike. Ndërkohë që e ka bërë një vijë të trashë ndarëse në skenën politike të Kosovës?
Pacolli: Unë nuk besoj në këtë. Por prapë duhet t’ju them se unë jam President i gjithë kosovarëve, pa marrë parasysh përcaktimin e tyre politik, fetar. Unë nuk mendoj se ka përçarje për shkak të Presidentit të Kosovës në mes të spektrit politik, gjegjësisht partiak. Unë besoj se në qoftë se ka diçka, ato janë hidhërime të momentit. Edhe një familje e vogël mund të ketë batica dhe zbatica, e lëre më aty ku formohet një Qeveri, ku të gjithë duan të bëhen pjesë e saj. Në këto raste edhe hidhërimet janë të arsyeshme, por unë nuk besoj se do të ketë përçarje. Nuk do ta preferoja atë, por do t’u lutesha të gjithëve që të jemi unikë dhe të bashkëpunojmë. Kosova është duke kaluar në një periudhë shumë të rëndësishme delikate dhe ne duhet të koncentrohemi në zhvillimin ekonomik – kusht ky për përmirësimin e jetës të qytetarëve të Kosovës.
Express: Gjatë tre muajve të fundit që para zgjedhjeve ka pasur plot fjalë dhe është komentuar çdo hap juaji. Cili është shpjegimi juaj për gjithë këto që ndodhën në media e debate të ndryshme?
Pacolli: Unë e njoh vetveten. Merrem me vetveten time. Jam përgjegjës për veprimet e mia. Në mënyrë morale dhe materiale iu përgjigjem veprimeve të mia kurdoherë që ato kanë ndodhur. Ju garantoj dhe i siguroj qytetarët e Kosovës se asnjë veprim në jetën time nuk e kam bërë që ka shkuar në dëm të qytetarëve të Kosovës dhe shtetbërjes së Kosovës. Unë kam vepruar për këtë dhe do të veproj për një ardhmëri më të mirë të qytetarëve të Kosovës. Jeta ime ka qenë e tillë dhe ka qenë e pamundur pa krijuar kuriozitet te njerëzit. Mund të them se jeta ime është një histori e suksesit. Aty ku ka sukses, ka koncentrim të opinioneve të cilat ndahen në dy pjesë. Janë ato konstruktive, por janë edhe ato negative, të cilat vijnë prej xhelozive të ndryshme, prej dëshirës shumë të madhe që dikush vetë do të kishte dëshirë t’i bënte ato që i kam bërë unë. Ka dhe shumë të tjera, prandaj për mua është e qartë të flas për eksperiencën. Suksesi im, rrugëtimi im, normalisht nuk ka qenë i mirëseardhur për të gjithë. Është e pamundur që të mos përflitet nga puna ime – një kosovar i thjeshtë që shkon në një shtet demokratik, në një shoqëri demokratike, në një shoqëri super të zhvilluar ekonomikisht. Në qendër të Zvicrës dhe aty të bëhet faktor me punën e tij. Shembull, ish-kompania ime “Mabetex”, në vitet ’90 ishte njëra nga 74 kompanitë më të mëdha të llojit të vet në Zvicër. Merreni me mend tani se çfarë ekonomie botërore është e koncentruar në Zvicër. Ish-kompania ime ishte njëra nga dhjetë firmat tatimpaguese më të mëdha që paguanin tatimet në kantonin ku ajo vepron. Dhe, krejt kjo normalisht ka ngritur tema për të diskutuar. Unë ju them se të veprosh në Zvicër, ku mbi të gjitha është Ligji dhe pas 30 vitesh punë të kesh një ekstrakt të pastër nga regjistri i të hetuarve, është vështirë. Kjo është vështirë t’i ndodhë një punëtori të thjeshtë atje, e lëre një kompanie. Unë ju them se sot e kam një ekstrakt të pastër nga shteti zviceran se asnjëherë gjatë 30 viteve të punës nuk kam qenë i dënuar. Asnjëherë nuk kam pasur llogari bankare të bllokuar. Asnjëherë nuk kam qenë i dënuar. Më falni, po flasim për një shtet si Zvicra, e jo për shtete siç pretendon dikush. Ne jetojmë në një botë demokratike dhe njerëzit mund të flasin. Unë ju them juve tani se po ta filloja prapë jetën, unë do ta zgjidhja të njëjtën rrugë që kam jetuar deri tani.
Intervistën e plotë mund ta lexoni në Express...