Përplasje me armë në qendër të qytetit, dy në pranga

Dy punonjës të bashkisë së qytetit të Kukësit, F.Cena dhe Z.Sopi, përkatësisht 36 dhe 32 vjeç, janë grindur mesditën e djeshme për motive të cilat policia i cilëson si banale, por duke rrezikuar jetën e njëri-tjetrit me armë zjarri. Ngjarja ka ndodhur në qendër të qytetit të Kukësit, te "Shtëpia e oficerëve", në orën 12:00 të ditës së djeshme, kur qytetarët e ndryshëm pas krismave të armëve kanë njoftuar policinë. Kjo e fundit ka mbërritur brenda pak minutash në vendngjarje dhe ka shoqëruar të dy personat në komisariat, ku po bëhen hetime për zbardhjen e ngjarjes. Të dy protagonistët e sherrit nuk pranojnë të kenë përdorur armët kundër njëri-tjetrit, pasi nuk janë lënduar asnjëri. Por burime të drejtorisë së policisë tregojnë se në vendngjarje janë gjetur dhe sekuestruar pesë gëzhoja pistolete dhe po hetohet për gjetjen e armës që ka realizuar shkrepjet. Të dy personave të paraburgosur nuk u është gjetur armë me vete dhe as në shtëpi gjatë një kontrolli që kanë bërë efektivët blu. I njëjti burim tregon se shkaku i sherrit ka qenë banal, ndërsa burime të tjera thonë se janë grindur për shkaqe pronësie. Rastet e përdorimit të armëve në qytetin e Kukësit nuk kanë qenë të rralla. Vetëm dy-tre muaj më parë një shtetas qëlloi kundër një drejtuesi vendor, por pa mundur ta shënojë në trup.