Polanski merr "Ariun e Argjendtë" në arrest shtëpie
Pas 46 vjetësh trofeu "Ariu i Artë" shkon në Turqi. Historia e një djali 8-vjeçar nga një skaj u humbur i Turqisë, jeta e ëmbël e të cilit merr një kthesë të hidhur, kur ai humbet të atin, ka prekur jurinë e Berlinales. "Bal" ("Mjaltë") i regjisorit Semih Kaplano?lu, triumfon në edicionin e 60-të të Festivalit Ndërkombëtar të Filmit në Berlin. Ariun e Argjendtë për regjinë më të mirë e meritoi Roman Polanskit, me filmin "The Ghost ëriter", ndonëse gjendet në arrest shtëpie në Zvicër. Në ceremoninë e ndarjes së çmimeve, mbrëmjen e së shtunës, munguan edhe aktorët kryesorë Pierce Brosnan dhe Eëan McGregor. Trofeun e tërhoqi drejtori i filmit Alain Sarde, i cili përcolli edhe mesazhin e regjisorit, i cili kishte thënë se "edhe sikur të kisha qenë në gjendje nuk do të kisha ardhur, sepse herën e fundit kur isha në një festival për të marrë një çmim përfundova në burg". Sa i përket interpretimit autorial, "Arinjtë" u shkuan aktorëve japonezë dhe rusë. Shinobu Terajima u vlerësua për rolin e saj në filmin "Caterpillar", ku luan një grua që kujdeset me vetësakrifikim për të shoqin e plagosur rëndë në luftën japonezo-kineze të Paqësorit. Aktorët deri tani të panjohur në rrafshin ndërkombëtar Grigori Dobrigin dhe Sergei Puskepalis, të cilët ndajnë me njëri-tjetrin çmimin për interpretuesin më të mirë, luajnë në thrillerin psikik "How I Ended This Summer" të Alexei Popogrebskit dy burra, që punojnë në një stacion kërkimesh polare në Oqeanin Arktik. çmimin e Madh të Jurisë e fitoi rumuni Florin Serban për dramën rinore "Nëse dua të fishkëllej, fishkëllej". Tre filmat gjermanë pjesëmarrës në konkurrim nuk fituan çmime kryesore. Në mbyllje të Festivalit Ndërkombëtar të Filmit u prezantua filmi "Otouto" i regjisorit japonez Yoji Yamada, ku përshkruhet historia e një familjeje të shtresës së mesme. Yamada ishte nderuar më parë për punën e tij, me "Kamerën e Berlinales". Sa i përket prurjeve, në përgjithësi, të këtij edicioni, kritika, jo gjithnjë është shprehur optimiste. "Tepër e vrazhdë, tepër e zymtë, tepër vulgare". Këto janë disa nga gjykimet për një sërë filmash të edicionit të 6-të. Megjithatë ky edicion është pritur mjaft mirë nga publiku. Në fund të festivalit janë numëruar rreth 300 mijë bileta kinemaje të shitura, çka shënon një rekord për Berlinalen.