Policia zbardh ngjarjen e 13 viteve më parë, ku mbetën të vrarë dy persona

Policia e Shtetit pas dy vjet hetimesh ka zbardhur ngjarjen e ndodhur 13 vite më parë në Shënlleshën të Dibrës, ku pas një grabitjeje me armë, mbetën të vrarë dy persona. Sipas burimeve zyrtare, nga strukturat e Drejtorisë së Krimeve të Rënda të Departamentit për Hetimin e Krimeve në Drejtorinë e Përgjithshme të Policisë në bashkëpunim me Drejtorinë e Policisë së Qarkut Dibër dhe Prokurorinë e Rrethit Gjyqësor Mat, si rezultat i hetimeve intensive, duke përdorur metodat speciale të hetimit, u bë i mundur zbulimi i autorëve të vjedhjes me armë me pasojë vrasjen e shtetasve Asllan Meçi dhe Rasim Elezi, ngjarje e ndodhur në datën 19.11.1996 në vendin e quajtur Shënlleshën të rrethit Dibër. Sipas policisë, autorët e këtij krimi, emrat e të cilëve nuk bëhen publike për arsye hetimi, të armatosur dhe të maskuar, i kanë dalë përpara autobusit të pasagjerëve të Komunës së Reçit, kanë vrarë drejtuesin e autobusit shtetasin Rasim Elezi dhe arkëtarin e komunës shtetasin Asllan Meçi dhe më pas kanë marrë lekët e komunës, një shumë rreth 12 milionë lekë të vjetra, e janë larguar nga vendi i ngjarjes. Për autorët e kësaj vepre penale, nga Gjykata e Rrethit Gjyqësor Dibër, me vendim nr. 73, datë 27.10.2009, është caktuar masa e sigurisë “arrest me burg”. Nga hetimet e kryera, autorët e këtij krimi kanë rezultuar të jenë autorë të dyshuar edhe për disa veprave të tjera të rënda penale, të ndodhura në kohë të ndryshme në qarqet Dibër dhe Tiranë.