Pollo- Kompanive celulare: Ulni çmimet për konsumatorët e shërbimeve tuaja

Ulni tarifat për qytetarët, përpara se kjo të vendoset me vendim qeverie. Ka qenë kjo kërkesa e drejtpërdrejtë, që ministri për Inovacionin e Teknologjinë e Informacionit e të Komunikimit, Genc Pollo, u ka bërë dje në një takim drejtorëve të kompanive të telefonisë së lëvizshme AMC, Vodafone, Eagle dhe Plus. Takimi ka pasur si qëllim diskutimin mbi vëzhgimin e tregut të telefonisë së lëvizshme, të realizuar nga një kompani britanike, me porosi të AKEP-it. Studimi në fjalë tregon për marzhe fitimi tepër të larta dhe rekomandon uljen e tarifave të shumicës. Ministri Pollo u kërkoi drejtorëve të kompanive, se pas vendimit të AKEP-it, në shkurt 2011, do të pritej që kjo ulje e tarifave të reflektohej edhe te çmimet e përdoruesit. Ministri Pollo, pak kohë më parë, menjëherë pas deklarimit të kryeministrit Berisha, se Bankat e Nivelit të Dytë dhe kompanitë celulare kanë tarifa të çmenduar për shërbimet ndaj konsumatorëve, ai akuzoi këto kompani se kanë 10 vjet që vjedhin qytetarët shqiptarë.