Portugali, greva paralizon vendin

Një grevë 24-orëshe në Portugali ka ndërprerë fluturimet dhe transportin publik, në shenjë proteste ndaj masave të propozuara kundër krizës ekonomike.

Kontrollorët e trafikut ajror dhe punëtorët në sistemin e metrosë së Lisbonës ishin të parët që u hodhën në grevë vonë gjatë së mërkurës.

Me ta pritet të bashkohen qindra mijëra punëtorë të tjerë, përfshirë mësuesit dhe stafet e spitaleve të vendit.

Parlamenti do të votojë javën e ardhshme planin për reduktimin e deficitit, të imponuar nga BE dhe FMN në këmbim të ndihmave financiare.

Greva pritet të jetë më e madhja në historinë e Portugalisë, ku aksionet e sektorëve industrialë janë të rrallë. Greva mbështetet nga dy sindikatat kryesore të punës, që përfaqësojnë mbi një milionë punëtorë në rang vendi.

Portugalia është një prej vendeve të eurozonës, ekonomia e të cilave është në amulli. Ekonomia në këtë zonë u rrit me 0.2 për qind mes korrikut dhe shtatorit krahasuar me tremujorin e dytë të vitit.