Pranga 50-vjeçarit, tentoi të përdhunonte

Arrestohet 50-vjeçari, tentoi të kryejë marrëdhënie seksuale me dhunë me fqinjën e tij bashkëmoshatare. Ngjarja ka ndodhur në lagjen numër 16 të qytetit bregdetar të Durrësit. Burime nga Komisariati i Policisë në këtë qytet bënë të ditur dje se është bërë arrestimi në flagrancë i shtetasit Pashk Gjonaj, lindur në Laç dhe banues në lagjen numër 16 të Durrësit. Ndonëse i martuar, 50-vjeçari Gjonaj ka tentuar të përdhunojë një grua 53-vjeçare, banore e së njëjtës lagje. Burimet thanë se ngjarja ka ndodhur paraditen e së premtes, rreth orës 09:30, kur Gjonaj ka kërkuar të shuajë epshet e tij të sëmura, por 53-vjeçarja ka bërë rezistencë, çka e dëshmojnë dhe plagët e shkaktuara në trupin e saj nga përleshja me Gjonajn. Gjatë kryerjes së veprimeve të para hetimore, eksperti mjeko-ligjor konstatoi dëmtime fizike në pjesë të ndryshme të trupit të së dëmtuarës. Ndaj agresorit nisi hetimi nga prokuroria për veprën penale të marrëdhënieve seksuale me dhunë me të rritura.