Prangoset hajduti profesionist

Zbardhet pas pesë ditësh hetimesh, vjedhja e
filialit të Alba Postës në qytetin e Poliçanit, në
zyrën e së cilës u vodhën 1.5 milionë lekë.
Burime nga Policia e Qarkut të Beratit bëjnë të ditur
se mëngjesin e djeshëm ka rënë në pranga Saimir Zylyftari,
i identifikuar si autor i dyshuar i kësaj
vjedhjeje. Ka qenë ora 08.00 e mëngjesit të djeshëm,
kur uniformat blu kanë prangosur në banesën e tij
30-vjeçarin Zylyftari, banor i qytetit të Poliçanit. Nga
hetimet në vendin e ngjarjes, por dhe marrjes në
pyetje të një numri të madh banorësh të lagjes ku
ndodhi vjedhja, policia ka arritur të identifikojë autorin
e vjedhjes. Burime zyrtare nga policia bëjnë të
ditur se nga veprimet operative dhe procedurale,
gjatë kontrollit në banesën e të riut janë sekuestruar
në cilësinë e provës materiale shuma prej 850 mijë
lekësh, që mësohet se është pjesë e parave të vjedhura
në ambientet e filialit të postës. Veç parave, është
bllokuar një makinë tip "Renault Clio" me targa DR
78 35 E, pronë e autorit të dyshuar dhe një aparat
celular i tipit "Nokia". Burime zyrtare konfirmojnë se
30-vjeçari Zylyftari njihet si person me precedent të
mëparshëm për vjedhje. Ai është dënuar në Holandë
dhe Francë për vjedhje të banesave dhe shpërndarje
të lëndëve narkotike.