Prefekti i Gjirokastrës thotë se po ushtrohet terror psikologjik në përvjetorin e Enverit

Gjirokastër, 9 tetor 19:41 NOA - Qyteti i Gjirokastrës është gdhirë sot i mbushur nga parulla në kujtim të 100 vjetorit të lindjes së ish-diktatorit komunist Enver Hoxha. Mbishkrimet ishin “Lavdi Veprës dhe Figurës së Enver Hoxhës”, “Mirë se erdhe Enver Djali”, “Rroftë Partia Komuniste”.

Sakaq, gjatë ditëve të fundit, në prag të 100 vjetorit të lindjes së ish udhëheqësit komunist, Enver Hoxha, persona anonimë kanë vizatuar në fasadat e ndërtesave të ndryshme në qytetin e Gjirokastrës me bojë të kuqe parulla dhe yje me pesë cepa, simbol i mirëfilltë komunist. Ato ishin shkruar me bojë të kuqe në muret e zonës muzeale të qytetit.

Lidhur me këtë dukuri, Prefektura ka kërkuar distancimin nga parullat që vijnë pak ditë para përkujtimit të 100-vjetorit të ditëlindjes së ish-diktatorit komunist, ditë në të cilën janë parashikuar disa aktivitete nga mbështetës dhe familjarë.

“Segmente të interesuara u rikthehen metodave të terrorizmit psikologjik duke e mbushur qytetin me parulla që evokojnë figurën e diktatorit që si askush tjetër në histori zhyti vendin në persekutim  që njihet botërisht”, tha sot në deklaratën për media, prefekti Spiro Ksera.

“Duke marrë në konsideratë ankimet e një numri qytetarësh, - vijon deklarata, - që shprehin indinjatë për këtë dhunë psikologjike dhe duke dashur të mbrojmë nxënësit dhe gjithë rininë nga kjo dhunë, u bëjmë thirrje autoriteteve vendore për të përdorur të gjitha mundësitë ligjore për zhdukjen e parullave”.

Ksera kërkoi që parullat të largohen sidomos nga institucionet fetare, shtetërore dhe qendrat kulturore, duke theksuar që “të bëhet pastrimi i tyre brenda një afati sa më të shkurtër”.

a.l/NOA