Presidenti Sejdiu në nëntor, vizitë në Tiranë

Presidenti i Kosovës, Fatmir Sejdiu, vjen në Tiranë në mesin e muajit nëntor me ftesë të homologut shqiptar, Bamir Topi. Kreu i shtetit më të ri të botës është ftuar nga z. Topi gjatë mbledhjes së para disa ditëve të OKB-së, në SHBA. Ndonëse ende nuk ka një datë fikse për ardhjen e Sejdiut në Tiranë, mësohet se gjatë qëndrimit në Shqipëri ai do të marrë pjesë në ceremoninë e dhënies së ndërtesës për ambasadën kosovare. Kjo, për faktin pasi ambasadori Gazmend Pula i cili paraqiti para tri ditëve letrat kredenciale, përkohësisht është vendosur në një nga ndërtesat në “Rrugën e Kavajës”. Por rezidenca e tij, dhuratë nga qeveria shqiptare, është tek Vila nr. 6, në qendër të Tiranës, konkretisht mes ambasadës ruse dhe asaj serbe. Kjo ndërtesë i është nënshtruar restaurimit të plotë dhe pritet të përfundojë brenda dy javëve, kohë që përkon dhe me vizitën zyrtare të Presidentit të Kosovës, Fatmir Sejdiu.