Pret damarët e dorës, familjarët shpëtojnë në kohë adoleshenten

Një 17-vjeçare ka tentuar t‘i japë fund jetës, duke prerë damarët, por ndërhyrja në kohë i shpëton jetën. Dje, rreth orës 10:10, e mitura S.P, lindur në Tropojë dhe banuese në fshatin Arapaj të Durrësit, është paraqitur në spitalin e qytetit bregdetar me damarët e njërës dorë të prerë. Nga veprimet e para dhe deklarimet e familjareve rezultoi se vajza ka qenë duke bërë punët e shtëpisë kur e ëma e ka gjetur duke larë dorën të cilën e kishte me gjak dhe më pas i ka rënë të fikët në shtëpi. Menjëherë familjarët e kanë dërguar në spital, ku mjekët konstatuan se ishte dëmtuar në dorën e majtë te damarët afër kyçit. Mbas mjekimeve të marra, bëhet e ditur se vajza është jashtë rrezikut për jetën dhe se është larguar për në banesën e saj. Ndërkaq u krye ekspertimi mjekoligjor dhe po punohet për sqarimin e plotë të rrethanave të ngjarjes. Nga ana tjetër, policia deklaroi se ka nisur hetimet për çështjen, për veprën penale të "shkaktimit të vetëvrasjes së mbetur në tentativë".