Projektligji për prokurorinë, garanci për pavarësi

Projektligji “Për organizimin dhe funksionimin e Prokurorisë së Republikës së Shqipërisë, i ndryshuar”, siguron pavarësinë e këtij institucioni. Drafti i ri i qeverisë do të miratohet në Kuvend brenda këtij sesioni parlamentar. Kalendari 3-javor i punimeve të Kuvendit, i miratuar nga Konferenca e Kryetarëve, përfshin ndër të tjera dhe shqyrtimin e këtij projekti të rëndësishëm në seancën e fundit plenare për vitin 2008, më 29 dhjetor. Projektligji, për të cilin është informuar edhe më parë nga drejtues të Ministrisë së Drejtësisë, vlerësohet si një draft që garanton pavarësinë e organit të akuzës nga ekzekutivi dhe përgjegjshmërinë e tij para ligjit. Drafti është fryt i një bashkëpunimi disamujor midis institucioneve dhe ekspertizës ndërkombëtare në fushën e ligjeve të misioneve EURALIUS dhe OPDAT. Gjatë miratimit të këtij projekti në qeveri pak ditë më parë, Kryeministri Sali Berisha, ndërsa vlerësoi punën e Ministrisë së Drejtësisë në hartimin e draftit, i bëri thirrje opozitës që ta shqyrtojë dhe të paraqesë vërejtjet dhe sugjerimet e saj rreth projektit, për t'i hapur rrugën miratimit bashkarisht të ligjit. Nisma ligjore e qeverisë për organizimin dhe funksionimin e institucionit qendror të akuzës ka shkaktuar reagime nga opozita e majtë, e cila paraprakisht ka kontestuar disa pika të saj.