Prokuroria ; Kërkohet sekuestrimi i pasurive të Nikolin Cakos

Prokuroria e Krimeve të Rënda i kërkon gjykatës sekuestrimin e pasurive të të dënuarit Nikolin Cako. I cilësuar si kreu i grupit kriminal “Go West”, Nikolin Cako është dënuar me 11 vjet heqjse lirie, si dhe gjobë prej 8 milionë lekësh. Tashmë, prokuroria kërkon sekuestrimin e tre banesave të tij, ndër të cilat edhe apartamenti i përshtatur si “laborator” për falsifikimet, një kat më lart se shtëpia ku ai banonte me familjen, si dhe llogarinë e tij bankare. Akuzat që rëndonin mbi të pandehurin Cako kishin të bënin me “grupim të strukturuar kriminal dhe kryerjen e veprave kriminale nëpërmjet këtij grupimi”, “falsifikim dokumentesh”, “dhënie ndihme për kalim të paligjshëm”. Nikolin Cako ka qenë pronar i agjencisë së udhëtimeve “Go West” me vendndodhje te “Rruga e Durrësit”, pranë bllokut të ambasadave në Tiranë. Ky i pandehur, në bashkëpunim me të pandehurit e tjerë, organizonte kalimin e paligjshëm të kufirit të shtetasve të ndryshëm, duke i pajisur me viza, dokumente të falsifikuara, kundrejt pagesës në varësi të linjave të udhëtimit që varijonin në shumat 10.500 deri në 16.000 euro.

Lorena Kollobani