Protesta e minatorëve, sot takime me përfaqësuesit e METE-s

Minatorët e Bulqizës vijojnë sot ditën e katërt të protestës ndërkohë që pritet që sot ata të takohen edhe me përfaqësues të ministrisë së ekonomisë.
Një ditë më parë këshilltari i ministrit Nasip Naço, Ervis Mëhilli deklaroi se ministria po zhvillon kontrolle në lidhje me firmën ACR e cila zhvillon aktivitetin mineral në minierën e Bulqizës ndërsa shtoi se sot do të ketë edhe një takim me të gjitha palët ku do të informohet me kërkesat dhe pretendimet e tyre.
Ndërkohë minatorët e minierës së Bulqizës kërcënuan dje nëse nuk do të plotësohen kërkesat e tyre brenda dy ditëve do të futeshin në grevë urie.
Minatorët e Bulqizës që prej ditës së hënë kanë nisur protestat duke kërkuar kushte më të mira pune, rritje rroge dhe ulje të moshës të daljes në pension.