Pukë, katër vetë bllokohen në borë

Dështojnë tentativat për të ndërhyrë nga ajri për shpëtimin e të bllokuarve

SHKODËR - Dëbora e madhe dhe temperaturat e ulëta kanë sjellë bllokimin e katër personave në afërsi të stacionit të antenave televizive në Midë të Pukës. Paraditen e së mërkurës, një nga punonjësit e këtij sektori dhe tre ushtarakë janë nisur me mjetin e tyre fuoristradë drejt kullave transmetuese të Midës për të bërë ndryshimin e turnit. Sipas burimeve nga policia, nga dëbora e madhe që arrin në 1,5 m dhe ngrica, ata kanë mbetur të bllokuar në zonën e Krrabit në afërsi të stacionit të pompave. Kanë mundur të lidhen me telefon dhe të kërkojnë ndihmë duke thënë se nuk lëvizin dot, pasi dëbora e ngrirë në shtresa të mëdha pengonte lëvizjen e tyre. Pas njoftimit, nga ana e policisë u përpoq të realizohej ndërhyrja nga ajri për të tërhequr Nazmi Hilën, Pjerin Vocin, Angjelin Gerën dhe Arben Ndocin. Por përpjekjet e helikopterit për ndërhyrje ishin të pamundura për shkak të mjegullës. Ndërkohë, një furgon i policisë së Pukës, një fadromë dhe katër automjete të tjera u nisën aty ku kishin mbetur të bllokuar katër personat. Nazmi Hila, punonjës i Telekomit, pati bërë të ditur përmes linjës telefonike se kishin mundur të shkojnë deri tek stacioni i pompave dhe të ndiznin një zjarr. Ndërkohë, në orët e vona, punonjës të stacionit të Midës arritën deri në vendin ku ishin bllokuar katër shtetasit dhe i tërhoqën ata për në stacion, ndërsa policia nisi të veprojë nga toka për t'i kthyer ata në Pukë, duke qenë se Hila ishte në gjendje jo të mirë shëndetësore.