Punëtorja shtatzënë: Si u traumatizova në Gërdec

Armand Bajrami

Gjykata e Tiranës u njoh dje me gjashtë dëshmi të reja në procesin në ngarkim të 29 të pandehurve, të akuzuar si përgjegjës për tragjedinë e Gërdecit në 15 mars të vitit 2008. Të gjithë dëshmitarët, ish-punëtorë në fabrikën e demontimit të municioneve, treguan për kushtet e punës dhe momentet e shpërthimit të saj, ngjarje e cila vrau 26 persona dhe plagosi mbi 300 të tjerë. Dëshmitarja Ermira Berisha tregoi dje se ishte shtatzënë, teksa punonte në fabrikën e Gërdecit. Dëshmitarja u shpreh se kishte dëgjuar një plasje përpara se të ndodhte shpërthimi i 15 marsit 2008, që i kishte shkaktuar asaj traumë psikologjikë dhe probleme shëndetësorë, por i kishte kursyer jetën e foshnjës së palindur ende. “Kam ndenjur 2 muaj e gjysmë në kurë intensive me psikologë. Dëgjoja zhurma dhe më dukej sikur shikoja flakë në çdo moment”, tha dje para gjykatës, dëshmitarja. Sipas dëshmitares, ditën e ngjarjes ishte dëgjuar një plasje dhe pastaj kishte rënë zjarri. “U dëgjua një plasje dhe pastaj ra zjarri. Zjarri ra pranë derës së fabrikës”, u shpreh dëshmitarja. Kjo pjesë u kundërshtua nga prokurorët e çështjes. Sipas tyre, referuar deklarimeve të dëshmitares në Prokurori në vitin 2008 nuk ishte pohuar prania e një plasjeje para shpërthimit të flakëve. Dëshmitarët Thëllëza Gjoka dhe Hasan Dedej pohuan dje se, pas punësimit në fabrikë kishin firmosur një fletë, por pa e ditur nëse bëhej fjalë për rregullore të sigurimit teknik, apo tjetër. Bledian Baha dëshmoi në gjykatë se pas një rasti zjarri në fabrikë, ai kishte braktisur punën. “Ra një zjarr i vogël që u fik me kova uji. Të nesërmen unë ika nga puna, pasi pashë rrezikun që më kanosej”, tha Baha. Dëshmitarët Mehmet Plloçi dhe Elton Hasa treguan për procesin e punës në fabrikë. I pandehuri Dritan Minxolli, reagoi dje kur prokurori pyeti një dëshmitar për presidentin e firmës që punonte në Gërdec. “Albademi” ka pasur vetëm dy administratorë bashkëortakë, Mihal Delijorgji për palën shqiptare dhe Patrik Henry, për palën amerikane”, tha Minxolli.