Pushimet në spital, mjekët preferojnë të punojnë
Edhe pse zyrtarisht ndodhemi në pikun e verës, për mjekët nuk paska një ditë të bardhë... Ose janë vetë ata që nuk e kanë me qejf largim nga puna dhe heqjen dorë nga operacionet e gjithçka tjetër që ka lidhje me trajtimin e kujdesit shëndetësor kundrejt pacientit. Këtë vit ka ndodhur e kundërta e viteve të tjera. Dhe pse kemi hyrë në muajin korrik, drejtoria e qendrës spitalore “Nënë Tereza” sqaron se nuk ka asnjë pezullim të operacioneve me planifikim. Madje as mjekët dhe specialistët primarë të kësaj qendre nuk janë larguar ende me pushimet e verës.
Ajo që thuhet me siguri, është lëshimi i një urdhri nga ana e drejtorisë spitalore, e cila kërkon nga mjekët dhe punonjësit e qendrës spitalore universitare të planifikojnë pushimet e verës, në mënyrë që të rakordojnë punën ashtu siç duhet, pa krijuar vakume apo mungesa në shërbime e klinika të caktuara. Por jo vetëm kaq, ajo që është sqaruar nga spitali “Nënë Tereza” për këtë periudhë kohore janë masat mbrojtëse dhe detyrimet që ka për këtë sezon shtabi i emergjencave. Sipas QSUT-së, gjatë sezonit të verës janë përgatitur, formuar dhe udhëzuar rreth 50 grupe specialistësh, shtabe që do të jenë në gatishmëri për të gjitha shërbimet që i ofrohen popullatës. Operacionet me planifikim do të mbyllen atëherë kur temperaturat të rriten dhe të jenë të disfavorshme për kryerjen e ndërhyrjeve kirurgjikale. Me rritjen e temperaturave dhe vapës së madhe, në ambientet spitalore nuk zbatohet e njëjta procedurë ashtu si në vjeshtë, pranverë e dimër, ku numri i operacioneve është i lartë dhe i përditshëm. Në muajin qershor dhe në fillim të korrikut temperaturat kanë qenë normale, për të realizuar ndërhyrje kirurgjikale. Derisa ato të jenë të tilla, puna e operacioneve do të vijojë rregullisht, ndërkohë që pas ndryshimit të motit stafi do të kryejë vetëm operacionet urgjente dhe jo me planifikim, këto në infrastrukturën e nevojshme, larg infeksioneve që sjellin temperaturat e larta.
Grafiku i pushimeve të mjekëve për këtë verë do të nisë nga java e re dhe jo që në muajin qershor, ashtu si çdo vit tjetër. Arsyet janë për shkak të motit të paqëndrueshëm, por edhe sepse puna në spitale nuk është ndalur për temperaturat e ulëta, njësoj si në pranverë. Sakaq, rezervat e gjakut nuk janë në situatë alarmante apo kritike. Dhurimet e familjarëve, por edhe vazhdimi i operacioneve me planifikim kanë krijuar rezerva në qendrat e gjakut.