Që pas humbjes me Laçin, futbollistët e Tomorit pak ose aspak janë prononcuar në media

Nga RUSHAN DOSTI

Tomori me grip, Memushi terapi intensive

Tashmë njihet situata në kampin e futbollit beratas dhe vështirë se mund të gjendet ndonjë udhëdalje e shpejtë. Kjo edhe për faktin që beratasit ende vijojnë të luajnë jashtë qytetit të tyre për shkak të vonesave në rikonstruksionin e fushës së stadiumit Tomori. Tri humbjet e pësuara dhe gjendja aspak e mirë në klasifikim janë një tregues që po kërkojnë çdo ditë masa të reja teknikoorganizative nga ana e klubit dhe e stafit teknik.

Nuk bëhet fjalë për ndonjë krizë, por vetëm për një shock psikologjik, ose siç thuhet në raste të tilla, për një gjendje gripale, e cila gjithsesi kërkon një terapi intensive, në të kundërt shndërrohet në sëmundje kronike. Pikërisht këtë moment ka parasysh tekniku vlonjat i Tomorit, Eqerem Memushi, kur thotë se kjo skuadër, me elementë kaq cilësorë, është në kontrast të plotë me realitetin në të cilin luan, ndaj dhe ai prej ditësh e ka gjetur ilaçin nëpërmjet një terapie të plotë kurative. Fjala është për një proces stërvitor me ngarkesë të plotë, me qëllim që skuadra të marrë formën e saj dhe grupi të fitojë rezistencën fizike që kërkon një kampionat i gjatë dhe i vështirë, siç është superliga.

Trajneri Kam në dispozicion një grup lojtarësh shumë të mirë, por që ende nuk e kanë fituar ngarkesën fizike. Kjo skuadër ka nevojë për shumë punë dhe unë pikërisht këtë jam duke bërë, ti japë asaj atë përgatitje fizike dhe teknike që duhet për të përballuar kundërshtarë me parametra të lartë fizikë e teknikë. Edhe pse kushtet për stërvitje nuk janë aq të mira, përsëri jemi duke zhvilluar seanca me ngarkesë të lartë dhe para takimit të rëndësishëm me Kamzën shpresojmë që ekipi të reflektojë pozitivisht.

Natyrisht, kemi përpara një takim që ka të bëjë me çlirimin psikologjik të skuadrës, ndaj dhe kemi shumë nevojë për një rezultat pozitiv, – ka thënë traineri i Tomorit, Eqerem Memushi. Për sa i takon grupit të futbollistëve, duhet thënë se ata për momentin e kanë të vështirë të flasin apo të japin opinione para takimit me Kamzën, kjo edhe për ngarkesën psikologjike që ata kanë, por edhe për peshën e përgjegjësisë që ata mbajnë për dështimet në tri takimet e fundit.