Qëlloi mbi policët, dënohet 12 vjet burg

15/06/2005  TIRANË – Sokol Vuçeta qëlloi mbi punonjësit e policisë, pasi mori urdhër për t’u dorëzuar. Gjykata e deklaroi fajtor për veprën penale të vrasjes së mbetur në tentativë, duke e dënuar me 12 vjet heqje lirie. Nuk ka reaguar gjatë seancës për dhënien e vendimit. Ndërkohë që organi i Prokurorisë kishte kërkuar për të pandehurin dënimin me 20 vjet burg. Për gjykatën, kjo masë dënimi është tepër e rëndë, duke patur parasysh pasojat që kanë ardhur nga kryerja e veprës penale. Për gjykatën, i pandehuri është fajtor për ngjarjen e ndodhur në 29 prill 2004, kur qëlloi mbi policët që kishin marrë detyrë të ekzekutonin vendimin e gjykatës ndaj tij dhe vëllait. Në vendim, gjykata tha se i kërkuari i është përgjigjur me zjarr thirrjes së policisë, që vajtën në shtëpi për të ekzekutuar vendimin e gjykatës pas caktimit të masës së sigurimit burg pa afat. Së bashku me vëllain e tij, Luigj Vuçeta, në fillim të prillit të vitit të kaluar i morën një sasi të hollash shtetasit Nikolin Xhaferri. Për këtë vepër penale të parashikuar nga neni 109/1 KP, Gjykata e Shkodrës caktoi për vëllezërit masën e arrestit burg pa afat në mungesë. Nga informacionet, policia zbuloi se Sokol Vuçeta ndodhej në banesën e tij. Kështu, në datën 29 prill, policët Astrit Ago, Eduard Rusta, Pjerin Lazi, Nik Çudi, Paulin Zhibani dhe Çesk Kaçi, morën detyrën për të ndaluar të pandehurin.

Alma Çuka