Qëlloi shokun, në gjyq për vrasje

 

Trazhgim Sokolaj

Një person mbërrin i plagosur në gjendje të rëndë në QSUT në Tiranë. Pak orë më pas vdes si pasojë e plagëve, ndërsa policia lajmërohet prej mjekëve. Nuk ka asnjë dëshmitar që të tregojë për ngjarjen, vendi ku ka ndodhur krimi është mister ndërsa dy ditë më pas, nga dëshmia e një infermiere, policia mbërrin deri tek autori i ngjarjes. I cili është në fakt një koleg dhe shok i viktimës që nën peshën e fajit dhe të pendesës, duket se pranon autorësinë e krimit, të cilin dy ditë para arrestimit ishte përpjekur ta fshihte. Kjo është me pak fjalë historia e dosjes penale në ngarkim të 25-vjeçarit Shemsi Shaljani, i cili është dërguar i pandehur në gjyq me akuzën e “vrasjes nga pakujdesia” dhe “armëmbajtjes pa leje”. Dosja penale me nr.701 është dorëzuar në Gjykatën e Tiranës ditët e fundit, pasi prokuroria përfundoi hetimet dhe zbardhi rrethanat e ngjarjes së ndodhur mbrëmjen e 25 nëntorit 2008 kur në rrethana të paqarta, Ferdinand Gjata u paraqit i plagosur rëndë në Qendrën Spitalore Universitare “Nënë Tereza”. Fillimisht policia dyshoi se viktima kishte mbërritur aty në grahmat e fundit duke drejtuar makinën e tij që u gjend në oborr. Vendi ku ishte realizuar goditja me armë mbeti mister çka vështirësonte punën e policisë në gjetjen e provave dhe dëshmitarëve të krimit. Pas mjekimeve të para dhe ndihmës së dhënë nga mjekët, 25-vjeçari Ferdinand Gjata, nga Berati gjen vdekjen pa arritur të japë asnjë sqarim për ngjarjen. Gjithçka mbeti mister derisa agjentët e policisë shkuan dhe tërhoqën trupin nga spitali për procedurat e nevojshme të hetimit. Njëri nga agjentët e policisë që u aktivizua në hetimin e çështjes arriti që gjatë mbledhjes së dëshmive, të mësonte nga një infermiere e spitalit një fakt domethënës. I plagosuri që humbi jetën ishte përcjellë deri në oborrin e spitalit nga një person i cili e kishte braktisur 25-vjeçarin aty pranë, në mënyrë që të mos identifikohej nga mjekët apo persona të tjerë. Miku i 25-vjeçarit, njëkohësisht autor i vrasjes së tij, ishte larguar më pas në drejtim të panjohur derisa agjentët e policisë shkuan në makinën e 25-vjeçarit të vrarë dhe fiksuan aty të gjitha gjurmët e gishtave. Verifikimi i tyre zbuloi se disa shenja të lëna gjatë transportit të shokut në spital me makinë, ishin të Shemsi Shaljanit, i cili u shoqërua menjëherë në polici. Agjentët bënë kujdes gjatë pyetjes dhe i dyshuari duke menduar se policia dinte gjithçka rrëfeu krimin që kishte fshehur 48 orë më parë. Gjatë deklarimeve të tij, Shemsi Shaljani ka pohuar se ai dhe miku i tij Ferdinand Gjata mbanin një pistoletë pa leje, e cila kishte një defekt. Në një moment prove ajo kishte shkrepur duke shkaktuar goditjen e 25-vjeçarit që më pas humbi jetën. Për këtë ngjarje, miku i viktimës akuzohet se ka kryer “vrasje nga pakujdesia” dhe “armëmbajtje pa leje”. Dosja është dorëzuar në gjykatë dhe së shpejti pritet të fillojë procesi gjyqësor.