Qeveria jep 870 kuota master për Universitetin e Tiranës

 

Qeveria merr vendimin për hapjen e programeve të studimit, master i nivelit të parë në mësuesi, për arsimin e mesëm, me kohë të plotë, si dhe miratimin e kuotave të pranimit e të tarifës së shkollimit në këto programe, në universitetin e Tiranës. Ky vendim i marrë në mbledhjen e mbrëmshme të qeverisë është për vitin akademik 2008-2009. “Këshilli i Ministrave vendos hapjen, në Universitetin e Tiranës, të programeve të studimit, master i nivelit të parë në mësuesi, për arsimin  e mesëm, sipas fakulteteve, si më poshtë vijon: në Fakultetin e Gjuhëve të Huaja; b) në Fakultetin Histori-Filologji dhe c) Në Fakultetin e Shkencave të Natyrës”, thuhet në njoftimin e qeverisë. Në këto fakultet jepen 870 kuota studimi për në master. Programet e studimeve, master i nivelit të  parë në mësuesi, për arsimin e mesëm, realizohen me 60 kredite dhe zgjatja normale e tij është një vit. Sipas vendimit Universiteti i Tiranës shpërndan kuotat e vëna në dispozicion në masën jo më pak se 30 për qind, për studentët, që kanë përfunduar, të paktën, ciklin e parë të studimeve në institucionet e tjera të arsimit të lartë, dhe jo më shumë se 70 për qind, për ata që i kanë përfunduar këto studime pranë tij. “Në rastet kur nuk ka kandidatë nga institucionet e tjera të arsimit të lartë, që plotësojnë kriteret, atëherë Universiteti i Tiranës ka të drejtë ta plotësojë kuotën e vënë në dispozicion me studentët, që janë diplomuar në të. Kriteret e përzgjedhjes së kandidatëve, të përcaktuara nga njësitë kryesore të Universitetit të Tiranës, bëhen publike”, thuhet në pikën 4 të vendimit. Nxënësit me nota të shkëlqyer nuk e paguajnë masterin, ndërsa për shtresa të ndryshme sociale parashikohet pagesa në masën 50 për qind.

Kuotat e pranimit

 
a) Në Fakultetin e Gjuhëve të Huaja:
i) në lëndën gjuhë angleze        180;
ii) në lëndën gjuhë frënge        80;
iii) në lëndën gjuhë gjermane                 80;
iv) në lëndën gjuhë italiane                      120.

b) Në Fakultetin Histori-Filologji:
i)  në lëndën gjuhë-letërsi          120;
ii)  në lëndën histori            100;
iii) në lëndën gjeografi                100;

c) Në Fakultetin e Shkencave të Natyrës:
i)  në lëndën biologji                   60;
ii)  në lëndën kimi                      30;
iii) në lëndën fizikë                     60;
iv) në lëndën matematikë            40.