Qirinj për Leutrimin

Para Teatrit Kombëtar të Kosovës në Prishtinë, një grup i qytetarëve kanë ndezur qirinj në shenjë nderimi, respekti dhe dhimbjeje për vrasjen e 14-vjeçarit Leutrim Musliu nga fshati Uglar i Gjilanit.

Ndërkohë, gjykatësi i procedurës paraprake në Gjykatën e Qarkut në Gjilan të hënën ia ka caktuar 30 ditë paraburgim të arrestuarit nga Uglari, i dyshuar për vrasjen e Leutrimit.

Personi i dyshuar, i moshës 35-vjeçare është arrestuar nga policia para 3 ditësh, ndërsa organet e drejtësisë e ngarkojnë atë për armëmbajtje pa leje, rrezikim të përgjithshëm të sigurisë dhe me dyshim se ai është personi i cili e ka vrarë fëmijën 14-vjeçar në afërsi të fshatit. Caktimin e paraburgimit e kanë konfirmuar, të hënën, edhe zyrtarë të Prokurorisë së Qarkut dhe zyrtarë të policisë rajonale në Gjilan.

Përfaqësuesit e këtyre organeve kanë konfirmuar se arma e këtij personi si edhe e dy qytetarëve serbë nga Pasjani, tashmë fshat i Komunës së re të Parteshit, janë në ekspertizë balistike në Prishtinë për t’u vërtetuar se nga cila është shtënë në drejtim të fëmijës në ditën kritike.