Rama: 8 Dhjetori, është ditë historike për PS. PD: Falë nesh hytë në PSENga TemaKryetari i Partisë Socialiste, Edi Rama, mblodhi dje deputetët e grupit parlamentar, por edhe kryetarë të PS nga degë të ndryshme të vendit në një ceremoni për anëtarësim

Nëse dëshironi të lexoni edicionin online të gazetës në PDF klikoni këtu.

Kryetari i Partisë Socialiste, Edi Rama, mblodhi dje deputetët e grupit parlamentar, por edhe kryetarë të PS nga degë të ndryshme të vendit në një ceremoni për anëtarësimin e PSSH në Partinë e Socialistëve Evropianë. Rama e quajti një moment historik për Partinë Socialiste dhe për të gjithë anëtarët e saj pranimin e forcës politike që drejton në gjirin e PSE në Kongresin e Pragës. Rama tha se ky është një ogur i mirë, që erdhi pikërisht në një datë të shënuar, 19 vjet pas daljes nga bunkeri komunist.

“8 dhjetori i pardjeshëm ishte një ditë e shënuar, historike për Partinë Socialiste.

Partia jonë, me unanimitet të plotë, u pranua nga Kongresi i PES si anëtare me të drejtë vote në partinë e socialistëve dhe progresistëve evropianë. Sot ne kemi përfaqësuesin tonë edhe në presidencën e kësaj force të madhe të politikës evropiane.

Kemi mbërritur një stacion me rëndësi strategjike për të nesërmen, jemi integruar në një realitet të ri evropian dhe na takon të festojmë, me të gjithë ata që e sollën Partinë Socialiste të Shqipërisë deri këtu, në një festë brezash që do ta bëjmë në ditët e para të vitit të ardhshëm, me praninë e gëzueshme simbolike këtu në Tiranë të miqve të vjetër e partnerëve të rinj të Partisë Socialiste Evropiane.

Por sot, së bashku me anëtarët e delegacionit tonë në Kongresin e Pragës, dëshiruam të ndanim me ju, me të gjithë deputetët tanë në radhë të parë, këtë moment të veçantë të historisë sonë të përbashkët. Një histori që si të gjitha historitë ka momentet e veta të bukura dhe ato të trishta. Por, pa asnjë dyshim, historia jonë është ana më njerëzore e historisë së politikës shqiptare, pamja më intriguese e saj me debate, sfida e drama të një familjeje politike që asnjëherë askush tjetër s’qe në gjendje t’ia ofronte publikut në këta 19 vjet, paçka se ndodhi jo një herë që demokracia e brendshme të kthehej në një telenovelë të zakonshme. Nuk do të nguroja ta quaja ogurmirë futjen tonë në Partinë Socialiste Evropiane më 8 dhjetor, 19 vjet pas 8 dhjetorit që lëvizi derën e bunkerit, ku Shqipëria qëndroi e ndryrë dhe krejt e izoluar nga Evropa e bota për thuajse gjysmë shekulli. S’ka dyshim se askush prej nesh atëherë, në ditët e ndryshimit të madh të epokave, s’mundej të parafytyronte dot shumë nga gjërat që ndodhin sot, kaq shumë vjet më vonë, kur me sytë e atëhershëm na dukej se pas njëzet vjetësh do të kishim mbërritur në hënë, përderisa arritëm të dalim nga bunkeri i komunizmit”, - tha Rama.

Kryetari i PS shtoi se sot situata është dramatike dhe askush nuk do e imagjinonte se 8 dhjetori do ishte një miting urrejtjeje për opozitën.

“Kush mund ta parafytyronte atëherë se do të ishim sot ende kaq të varfër e të papunë, kaq të prapambetur në arsim e shëndetësi, kaq të pambrojtur nga barbaria kulturore e mjedisore dhe, mbi të gjitha ndoshta, që qytetarët e Shqipërisë do të ishin sot kaq pa shtet, kaq pa drejtësi, kaq pa siguri në këtë vend ku ligjet i shkelin të parët ata që i bëjnë e ku kush nuk ka lidhje me pushtetin s’ka gjasë të zgjidhë hall me shtetin? Ashtu sikundër askush nuk mund ta parafytyronte atëherë se, më 8 dhjetor të vitit 2009, pikërisht partia e dalë prej lëvizjes që shembi bunkerin komunist, do t’i mblidhte njerëzit në sheshin “Skënderbej” me hir e me pahir për të festuar nën tingujt e gjuhës së urrejtjes ndaj opozitës.

Por le të mos shpenzojmë sot më shumë kohë e fjalë për çka nuk ka shkuar në drejtimin e ëndrrës evropiane, e cila më 8 dhjetor 1990 nxori në rrugë studentët e ndryshimit epokal dhe le të mjaftohemi në këtë moment duke shtuar në bilancin pozitiv të partisë sonë, 8 dhjetorin 2009, ditën që na bashkoi ne, Partinë Socialiste të Shqipërisë, me Evropën e socialistëve e të progresistëve. Dhe le të shërbejë kjo arritje e bukur si një burim i ri energjie dhe vendosmërie në betejën e madhe për demokraci, ku Partia Socialiste është angazhuar aktualisht me të gjitha forcat dhe ku, me patjetër, do të arrijë qëllimin e saj për t’i dhënë Shqipërisë më në fund mundësinë të zhvillojë zgjedhje vërtet të lira e vërtet të ndershme të standardeve evropiane, për një Shqipëri ku demokracia funksionon, ku shteti i së drejtës është një realitet për të gjithë dhe ku ekonomia zhvillohet në mënyrë të qëndrueshme. Unë dua t’i falënderoj të gjithë, në radhë të parë të gjithë deputetët tanë, që po luajnë me kurajë e largpamësi një rol të pazëvendësueshëm në këtë betejë jetike për demokracinë e shtetin e së drejtës dhe dua të uroj shëndet e mbarësi për çdo anëtar të familjes sonë të madhe politike”, - tha Rama.

PD

Partia Demokratike përmes deputetit të saj, Genti Strazimiri, e quajti anëtarësimin e Partisë Socialiste në Partinë Socialiste Evropiane si një sukses që ka ardhur më së pari për shkak të kontributit të Partisë Demokratike.

“Partia Demokratike shpreh vlerësimin e saj për marrjen zyrtarisht të “Statusit të Anëtarit të Asociuar” në Partinë Socialiste Evropiane nga Partia Socialiste e Shqipërisë. E vlerësojmë këtë si një zhvillim pozitiv që vjen automatikisht si rezultat i faktit që Shqipëria ka firmosur dhe ratifikuar nga të 27 vendet anëtare të Bashkimit Evropian Marrëveshjen e Asociim-Stabilizimit, çka përbën një kusht “sine qua non” për një parti për të marrë statusin e anëtarit të asociuar. Me këtë rast do të ishte e udhës që zoti Rama të kërkojë ndjesë publike për bilbilat dhe boritë që përdori për të bllokuar firmosjen e Marrëveshjes së Asociim-Stabilizimit me Bashkimin Evropian, dhe ç’është më e rëndësishmja, të kuptojë se statusi i ri është i denjë vetëm për parti që respektojnë rregullat themelore të demokracisë”, - tha Strazimiri.