Rama firmos me Koblenc, Cani te Salernitana

Renaldo Rama është shqiptari i
radhës që do të militojë në kampionatin
gjerman. Mesfushori i
përfaqësueses Under-21 ka kaluar
me sukses provën te TuS
Koblenc dhe bindur trajnerin Uve
Rapolder për potencialin e tij. 19-
vjeçari, i cili militonte me moshat e
Olimpiakos Pireut, ka firmosur për
një vit e gjysmë me skuadrën ku
luajnë edhe shqiptarët Fatmir Vata
e Njazi Kuqi. "TuS ka siguruar shërbimet
e Renaldo Ramës", konfirmohej
në sajtin zyrtar të klubit të
Bundesligës II. "19-vjeçari nga
Shqipëria ka firmosur kontratë
deri në qershor të vitit 2010 dhe do
të mbajë fanellën me numër 16".
Rreth Ramës, tekniku Rapolder
deklaroi: "Nuk mendoj ende se
djaloshi është i gatshëm për një
vend si titullar. Ai është një lojtar i
së ardhmes dhe na kushtoi vetëm
800 euro. Gjithsesi, mund të konfirmoj
se kur ka topin ai bën gjëra
të jashtëzakonshme. Duhet ta orientojmë
në mënyrën e duhur dhe
të tregohemi të duruar me Renaldon".
Kuqeziu zhvilloi edhe një
provë disaditore te Hanover, pas
rekomandimeve të Altin Lalës.
Ndërkohë, një tjetër lojtar i ekipit
Shpresa ka ndryshuar skuadër.
Bëhet fjalë për sulmuesin Edgar
Cani. Pas përfundimit të huazimit
tek Askoli, Palermo, klubi që
zotëron kartonin e 19-vjeçarit, e ka
transferuar te Salernitana. Në këtë
mënyrë, Cani do të ketë mundësi
që të marrë eksperiencë në Serinë
B, përpara se të rikthehet te sicilianët
në qershor 2009.