Rama kërkon pajtim me Braçen

Pavarësisht divergjencave që ekzistojnë prej pak javësh mes liderit socialist Edi Rama dhe numrit dy të grupit parlamentar socialist, Erion Braçe, duket se Rama i beson ende atij. Në mbledhjen e djeshme të grupit parlamentar socialist, Rama ka shprehur pakënaqësi lidhur me fjalimet që kanë mbajtur deputetët socialistë në seancën e dy ditëve më parë në Kuvend ku diskutohej buxheti shtesë i vitit 2008, por ka vlerësuar së tepërmi fjalimin e Erion Braçes. “Ishte një fjalim i mirë”, - është shprehur Rama gjatë diskutimit në mbledhjen e grupit. Burime nga mbledhja thanë se Braçe nuk ka preferuar të bëjë asnjë koment lidhur me deklarimin e Ramës, duke mundësuar që kjo situatë të kalonte në qetësi. Kështu nëse Rama kërkon të pajtohet me Braçen, duket se kjo dëshirë i mungon deputetit socialist. Në dy javët e fundit, Erion Braçe akuzoi lidershipin socialist për opozitë të dobët dhe të butë duke kërkuar që bashkëpunimit me PD-në, selia rozë duhet t’i japë fund. Dy drejtuesit janë përplasur në mbledhjen e fundit të kryesisë, por Braçe ka folur dhe publikisht, madje akuzat e tij i ka transferuar edhe në Kuvend, ku i ka deklaruar mazhorancës se mund të vazhdonin ende të përfitonin “ kur i fundit që duhet të jetë i pari tani mendon se të denoncosh aferat tuaja korruptive do të thotë opozitë destruiktive”.