Rama në Velipojë: Politika të flas për njerëzit, jo për veten

Ekzistojnë të gjitha mundësitë për të ndryshuar jetën,po t'i jepet jetë një fuqie të re, asaj Socialiste. Këtë ka nënkuptuar në fjalën e tij Edi Rama, në Velipojë të Shkodrës, gjatë një takimi me banorët.

Kreu i Partisë Socialiste ka vazhduar turin e udhëtimit 'Dialog me Shqipërinë' në Velipojë, e cila edhe pse është zonë me pasuri natyrore të shfrytëzueshme vuan mungesën e ujit të pijshëm, energjisë si dhe perspektivës për të rinjtë që zgjedhin të largohen nga vendi.

Gjatë takimit që ai zhvilloi sot me banorët e këtij vendi, Rama është shprehur se politika që flet për veten duhet t'i lërë vend politikës që flet për njerëzit. 'Dështimet e politikës së vjetër duhet të marrin fund'-tha Rama. Ai theksoi se Partia Socialiste ka kërkuar një bashkim të ri përtej kufijve të vjetër partiake duke u shprehur se ka ardhur koha për t'i dhënë jetë një fuqie të re që duhet të burojë nga bindja se ekzistojnë të gjitha mundësitë për të ndryshuar jetën.