Rama shpërblen oficerin që i ruajti votat më 28 qershor

Edi Rama ka shpërblyer dje një prej bashkëpunëtorëve të tij më të ngushtë. Zyhdi Dajti do të jetë kreu i ri i Policisë Bashkiake dhe Rama zgjodhi ta prezantonte vetë pas largimit të drejtorit shumëvjeçar të kësaj policie, Ndrec Deda. Ndoshta shumëkujt emri i Zyhdi Dajtit nuk i thotë asgjë, por në selinë e Partisë Socialiste e njohin mirë dhe e dinë se është një njeri i besuar i Ramës. Dajti, oficer në lirim, ka qenë një ndër drejtuesit e ekipit që u krijua nga Rama për të ruajtur votat në 28 qershor. Grupi që përbëhej kryesisht nga ish-oficerë që aderonin si simpatizantë pranë PS-së, kishte marrë përsipër të krijonte një strategji dhe një strukturë që do të mundësonte ruajtjen e qendrave të votimit dhe të numërimit të votave për të parandaluar ndonjë parregullsi në kurriz të partisë. Por, megjithëse Rama deklaron se i janë vjedhur votat në 28 qershor dhe deri më tani nuk e ka pranuar rezultatin e këtyre zgjedhjeve, ka vendosur të shpërblejë një prej njerëzve që bëri punën e policit për PS-në. Ai ka marrë dje një nga postet më të rëndësishme në varësi të bashkisë së kryeqytetit që drejtohet nga Rama, atë të kreut të Policisë Bashkiake. Dajti ishte pjesë e kontingjentit të ish-policëve që PS i afroi pranë vetes që në vitin 2007 në zgjedhjet lokale. Ata punuan për të ruajtur votat e PS-së, megjithëse e gjithë puna e tyre është në prapaskenë dhe nuk bëhet publike nga partia. Gjatë prezantimit që Rama i bëri dje, vuri theksin tek roli i policisë. Ai tha: “me plot të drejtë qytetarët dhe qytetaret e Tiranës kërkojnë edhe më shumë nga ju, kërkojnë që Policia Bashkiake të jetë edhe më e përgjegjshme, të jetë edhe më e gatshme, të jetë edhe më e mirësjellshme, të jetë edhe më e aftë dhe e përgatitur për t’iu gjendur pranë. Edhe sikur të jetë një qytetar i vetëm që paraqet një problem që ka lidhje me cilësinë e jetës në komunitet”. Ndërkohë, paraardhësi i Dajtit, Ndrec Deda, ka qenë në krye të Policisë Bashkiake që prej krijimit të kësaj strukture policore, ndërsa pak ditë më parë dha dorëheqjen nga ky post.