Raporti, Këshilli Mbikëqyrës bëri ”kokë turku” Andi Belin
”Objeksionet e paraqitura me Shkresën Nr.10/1, datë 02.04.2007, të kryetarit të Këshillit Mbikëqyrës, z. Artan Hoxha, janë thjesht justifikime që mundohen të shmangin përgjegjësinë në keqmenaxhimin e KESH-it, i cili për vitin 2006 paraqitet me tregues të përkeqësuar, gjë që e ka çuar në kolaps të plotë financiar. Për këtë evidentojmë në pikën 6 të faqes 3 të observacionit të tij, ku thuhet se ”... Arsyet e moskryerjes të vëna mbi ekzekutivin e kompanisë janë marrë së fundi në shqyrtim edhe nga Këshilli Mbikëqyrës, i cili, në mbledhjen e datës 2 mars 2007, vendosi për lirimin nga detyra të drejtorit Andi Beli dhe zëvendësimin e tij nga z. Gjergj Bojaxhi.” Pra, nga vetë citimet e mësipërme, pranohet se Këshilli Mbikëqyrës ka marrë në analizë Ekzekutivin kur gjendja e korporatës arriti në nivele kritike. Nga kontrolli i ushtruar për aktivitetin ekonomiko-financiar konstatohet se mjaft vendime të Këshillit Mbikëqyrës kanë influencuar në përkeqësimin e gjendjes financiare që në disa raste janë shoqëruar edhe me dëme ekonomike. Me Vendimin Nr. 5, datë 10 nëntor 2005, ”Për Miratimin e Propozimit të Sh.a KESH për marrjen e Over Draftit për mbulimin e Letër Kredisë për pagesat e importit të energjisë elektrike deri në 8 milionë euro ekuivalent në lekë pranë Bankës Amerikane të Shqipërisë”, shoqërisë i është shkaktuar një dëm ekonomik në vlerën rreth 30 milionë lekë, për fondet e papërdorura për hapjen e garancive bankare. Vendime të ngjashme janë marrë edhe në lidhje me humbjet në rrjet apo për të tjera çështje dhe dokumentet dhe tabelat e siguruara kanë vërtetuar se si përfundim del e qartë se për keqmenaxhimin e KESH-it përgjegjësia e Këshillit Mbikëqyrës është evidente”.
Marrë nga raporti i KLSH-së
Skandali, Korporata e miliardave pa rregullore të brendshme
Ndërsa shkeljet dhe dëmet financiare kanë qenë të qarta në KESH, duket se gjetja e përgjegjësve për KLSH-në nuk ka qenë edhe aq e lehtë pasi ky institucion nuk ka një rregullore të brendshme, e cila do të strukturonte përgjegjësit dhe kufijtë e secilit drejtues apo punonjës. Kjo ka qenë edhe arsyeja që në listën e rekomandimeve të KLSH-së pika e parë ishte pikërisht rekomandimi se KESH duhej sa më shpejt të hartonte një rregullore të brendshme. “Të hartohet dhe miratohet rregullorja e brendshme e funksionimit të shoqërisë duke pasqyruar ndryshimet e bëra në strukturën e KESH-it”, - shkruhet në raportin e KLSH-së. Ndërkohë që pika e dytë e rekomandimeve ka lidhje me prokurimet. Nuk kishte si të ndodhte ndryshe kur ky kontroll i KLSH-së ka vërtetuar se prokurimet për blerjen e energjisë, dhe jo vetëm, kryhen jashtë çdo lloj standardi dhe kontrolli. “Të ngrihet njësia e prokurimit në strukturat e zonave të shpërndarjes elektrike“, - shkruan raporti i KLSH-së. Gjithashtu, KLSH-ja ka kërkuar që “të merret në analizë realizimi i investimeve të akorduara në vite nga fondet e donatorëve të huaj, të evidentohet problematika dhe të përcaktohen masat konkrete për plotësimin e të gjitha kushteve të përcaktuara në kontratat përkatëse”.
ANËTARËT E KËSHILLIT MBIKËQYRËS
ARTAN HOXHA KRYETAR
ZAMIR STEFANI ANËTAR
SUZANA PANARITI ANËTARE
AGIM BREGASI ANËTAR
LULZIM QINAMI ANËTAR
AHMET MANÇELLARI ANËTAR
RAJMONDA BOKSI SEKRETARE
15 Shkurt 2008