Reagimi për televizorët,peticion nga burgu 313

TIRANE – Heqja e televizorëve nga qelitë e burgut 313, të paraburgosurit reagojnë me një peticion. Firmosja e dokumentit është bërë pak ditë më parë nga 177 të paraburgosur, mes të cilëve 18 gra, të cilat i janë drejtuar Qendrës Shqiptare për Rehabilitimin e Traumës dhe Torturës, duke kërkuar ndërhyrjen në zgjidhjen e këtij problemi. Ndërkohë, ky institucion me anë të një njoftimi për shtyp, mesditën e djeshme, pohoi se kishte marrë në konsideratë ankesën e të paraburgosurve dhe se kishte përgatitur rekomandimet përkatëse për institucionet shtetërore dhe ndërkombëtare. “Ditët e fundit, QSHRT ka marrë ankesa nga 177 të paraburgosur të burgut 313, të cilët kanë firmosur peticion në lidhje me rregulloren e re të burgjeve, të miratuar dy javë më parë në mbledhjen e Qeverisë. Të paraburgosurit janë shprehur se ndryshimi i rregullores do të sjellë kufizime të disa të drejtave që ata i gëzojnë si: aparatet televizive, orari i ajrimit, dhe sasia e ushqimeve që u dërgojnë familjet, për të cilat pretendohet se janë fituar me grevë urie në vitin 2005. Kufizimi i të drejtës së informimit nëpërmjet televizorit, kufizimi ose mosplotësimi i kushteve për ajrosje, kufizimi i sasisë së ushqimeve që të burgosurit marrin nga familjet përbën shkelje të akteve ligjore vendëse dhe të BE-së. Të paraburgosurit pretendojnë se janë njoftuar që masa e heqjes së TV do të dekonspirojë hetimet e Prokurorisë, kur kjo e fundit, sipas tyre është e detyruar me ligj të ruajë sekretet e hetimit dhe jo t’ua shesë ato mediave. Ndërkohë, vetë të paraburgosurit pohojnë se grupi i të burgosurve që ndodhet në këtë fazë të hetimit mund të grumbullohet në një sektor të veçantë brenda institucionit, duke mos penalizuar kolektivisht të tjerët”, përfundon njoftimi. fa.ma.