Rifreskimi i lejeve të qëndrimit, tani çdo 40 ditë

 

TIRANE - Të gjithë shtetasit e huaj që punojnë në vendin tonë dhe ushtrojnë aktivitete të ndryshme, duhet të rinovojnë lejet e qëndrimit, pasi afatet kanë ndryshuar, në të kundërt do të largohen nga Shqipëria. Vendimi është marrë nga Departamenti i Kufirit dhe Migracionit në Drejtorinë e Përgjithshme të policisë. Në një kohë që vitin e kaluar një leje qëndrimi rinovohej një herë në 3 muaj, tashmë një veprim i tillë duhet të bëhet për çdo 40 ditë. Në rast se rinovimi nuk bëhet për brenda afatit të paracaktuar do të ketë penalitete, që nga procedimi penal, e deri tek mbyllja e aktivitetit dhe largimi nga Shqipëria. Drejtoria e Kufirit dhe Migracionit njofton të gjithë shtetasit e huaj që ushtrojnë aktivitete të ndryshme në Shqipëri, se kanë ndryshuar afatet e qëndrimit dhe aplikimet për rinovimin e tyre duhet të nisin sa më shpejt, para se të skadojnë. Në të gjitha drejtoritë e qarqeve janë afishuar njoftimet që shpjegojnë procedurat dhe kohëzgjatjen e qëndrimit në vendin tonë, si dhe mënyrën se si duhet të plotësohet formulari për lejet e qëndrimit. Sipas burimeve nga policia, mësohet se që nga fillimi i vitit e deri tani kanë aplikuar për rinovim të lejes së qëndrimit rreth 700 shtetas të huaj, të cilët pritet të marrin lejen, ndërkohë që vazhdojnë aplikime të tjera.