Romano Prodi në Tiranë: “Perspektiva e Shqipërisë, integrimi në BE”

Ish-kryeministri i Italisë, Romano Prodi, ishte i pranishëm dje në Tiranë, ku mori pjesë në konferencën me temë “Zgjerimi i BE-së drejt Ballkanit Perëndimor dhe integrimi i Shqipërisë”. Gjatë fjalës së tij në këtë konferencë Prodi e cilësoi situatën ku ndodhet Shqipëria si më të favorshmen për hyrjen në BE, krahasuar me situatën e vendeve fqinje, Serbinë apo Bosnjë-Hercegovinën. Duke folur për politikat e zgjerimit të BE-së, Prodi shprehu mendimin nuk mund të ketë paqe në Europë nëse në të nuk do të përfshihen dhe vende të tjera. “Ky unifikim i Europës duhet të ndodhë jo për një kohë të shumë të gjatë, pasi shtyrja në kohë do ta bënte më të vështirë realizimin e këtij qëllimi. Shqipëria paraqitet homogjene për të hyrë në Europë, ndërkohë që në Samitin e fundit të Aleancës ajo mori ftesën për anëtarësim në të, ndërkohë që BE-ja dhe NATO-ja janë dy organizata të lidhura mes tyre”, - theksoi politikani italian. E pranishme në këtë takim ishte dhe kryetarja e Kuvendit, Jozefina Topalli. Ish-kryeministri italian ka zhvilluar dje dhe një takim me presidentin shqiptar, Bamir Topi.

Ndoka pret përfaqësues të Unionit Demokristian të Italisë

Kryetari i PDK-së, Nard Ndoka, priti dje në selinë e Partisë Demokristiane një delegacion të Unionit Demokristian të Italisë të kryesuar nga Luigi Baruffi. Gjatë takimit Ndoka i informoi demokristianët italianë për historikun e Partisë Demokristianë të Shqipërisë, për arritjet e kësaj partie në këto vite, për rezultatin e arritur në zgjedhjet e fundit vendore dhe për kontributin që kjo parti po jep në qeverisjen e vendit, në kryerjen e reformave dhe në nxitjen e proceseve integruese. Më tej kryetari i PDK-së tha se shqiptarët kanë qenë dhe do t’i jenë përjetë mirënjohës Italisë dhe qytetarëve të saj për ndihmën e madhe që i kanë dhënë popullit tonë në momentet e vështira të përmbysjes së diktaturës dhe gjatë gjithë këtyre viteve, kur ne përjetuam një tranzicion të dhimbshëm dhe me shumë probleme. Baruffi dhe përfaqësuesit e tjerë të UDC-së mbështetën plotësisht qëndrimet politike të PDK-së dhe garantuan Ndokën se PDK-ja do të ketë mbështetjen e vazhdueshme të UDC-së në përpjekjet e saj për konsolidimin e demokracisë në Shqipëri dhe për integrimin e saj në strukturat e euroatlantike. Bartuffi deklaroi se UDC-ja do të mbështetë PDK-në në fushatën e ardhshme elektorale politikisht dhe me ekspertët e saj. Ai theksoi se shkëmbimi eksperiencës politike midis dy partive do të afrojë edhe më shumë dhe do të garantojë suksesin tonë të përbashkët.

28 Qershor 2008