Rraklli: Dola për të mos rrezikuar

21/03/2005  Sulmuesi i Tiranës, Altin Rraklli edhe pse jo në 100% të formës së tij, e ka bërë mësë miri punën e tij, në ndeshjen kundër Shkumbinit, duke shënuar një gol të shkëlqyer, që i ka hapur rrugën fitores numër 20 të Tiranës në këtë kampionat. Pas golit të shënuar, në minutën e 23-të, ai ka lënë fushën e lojës për të mos rrezikuar më shumë, pasi edhe kondicioni i tij fizik nuk është në nivelin maksimal. Vetë kavajasi i Tiranës ka shpjeguar,se ai ka dalë nga fusha e lojës për të mos rrezikuar më tej. Sipas tij, kjo është bërë e mundur edhe me konsensusin e stafit teknik dhe mjekësor të skuadrës. “Duke qenë se nuk isha në formën time më të mirë, vendosa të dal nga fusha e lojës. Sigurisht, ky nuk një vendim i marrë vetëm nga unë. Para se të dilja kontaktova me stafin mjekësor të skuadrës dhe me trajnerin dhe mora OK-in e tyre. Ky zëvendësim ishte për të mos rrezikuar më shumë”, ka shpjeguar sulmuesi i Tiranës, Altin Rraklli. Veç kësaj, ai ka folur edhe për skuadrën e tij, por në mënyrë diplomatike, ka deklaruar se për titullin do edhe disa kohë për të folur me më shumë siguri. “Nuk më pëlqen të flas para kohe për çështjn e titullit. Sigurisht që kemi një avantazh të konsiderueshëm nga Elbasani, por në lojë janë edhe 24 pikë të tjera, ndaj duhet të luftojmë deri në fund”, ka nënvizuar Altin Rraklli.