Rrëmbimi i biznesmenit grek, tre shqiptarë në pranga

Selanik

Një shqiptar është arrestuar nga policia greke, pasi dyshohet se është njëri prej autorëve që kryen rrëmbimin e biznesmenit grek, Jorgo Evazoglu. Pas një periudhe hetimi, agjentët e policisë greke kanë arritur që të identifikojnë autorët. Sipas policisë, personat që kishin marrë pjesë në këtë rrëmbim ishin tre dhe të gjithë i përkisnin kombësisë shqiptare. I fundit i këtij grupi ishte 35-vjeçari, i cili u prangos dy ditë më parë dhe emri i të cilit nuk identifikohet për arsye hetimore. Agjentët kishin organizuar një tjetër operacion pak kohë më parë, ku kishin vënë në pranga dy pjesëtarët e tjerë të grupit të rrëmbyesve. Policia nuk jep identitetin e të arrestuarit, megjithatë, mësohet se u është dashur shumë punë gjatë arrestimit, pasi shqiptari ka qenë i armatosur dhe ka pasur shkëmbim zjarri midis dy palëve. Përplasja ndodhi në Selanik, qyteti që konsiderohet i dyti për nga madhësia dhe popullsia në Greqi. Sipas policisë, 35-vjeçari është i njohur si kontingjent për ta, pasi ka pasur të tjerë precedentë penalë. Rreth 10 vjet më parë, ky shtetas ishte përfshirë në rrëmbimin e një vajze 16-vjeçare. Referuar të njëjtave burime, ai është shoqëruar menjëherë për në qelitë e paraburgimit, në pritje për të dalë përpara drejtësisë greke, me akuzën e “rrëmbimit të personit”.

Arrestimi

I riu shqiptar u arrestua mbrëmjen e dy ditëve më parë nga policia e Selanikut. Sipas njoftimit të policisë greke, ata kishin arritur që ta lokalizonin dhe rrethonin 35-vjeçarin, në afërsi të shinave pranë stacionit hekurudhor të Selanikut. Megjithatë, kur e ka parë se ka qenë i rrethuar, shqiptari është përpjekur që të rezistojë, në mënyrë që t’i shmanget arrestimit. Ai ka qenë i armatosur dhe ka filluar të qëllojë ndaj agjentëve, me qëllim që t’u largohet atyre. Por, policia greke ka rrethuar tërë zonën, duke bërë që për 35-vjeçarin të jetë i pamundur largimi. Kur kanë parë se shqiptari ka nisur që të qëllojë, edhe ata i janë kundërpërgjigjur zjarrit. Përplasja me armë ka qenë e rrezikshme, pasi në ato momente ka pasur disa dhjetëra kalimtarë, të cilët ndodheshin në stacionin hekurudhor dhe rrezikoheshin nga plumbat. E gjithë ngjarja e prangosjes së shqiptarit të dyshuar për rrëmbimin e biznesmenit ndodhi në prani të disa dhjetëra kalimtarëve që u vunë nën panik.

Ngjarja

Ngjarja për të cilën u krye arrestimi i shqiptarit ndodhi 24 tetorin e kaluar, ku ai akuzohet se së bashku me dy shqiptarë të tjerë, një 25-vjeçar dhe një tjetër 23-vjeçar, rrëmbyen biznesmenin 59-vjeçar Jorgo Evazoglu. Ata ishin të armatosur me armë zjarri dhe arritën që ta rrëmbenin 59-vjeçarin, duke e mbajtur peng për disa ditë në këmbim të një shume të konsiderueshme në miliona euro. Rrëmbimi i biznesmenit grek u krye në zyrën e kompanisë së tij në lokalitetin Kalohori dhe ai u mbajt peng për pesë ditë rresht nga tre djemtë shqiptarë. Ata e kishin çuar Evazoglunë në një apartament në qendër të qytetit Sikies, në rajonin e Selanikut. Ata u kërkuan familjarëve për të lënë të lirë 59-vjeçarin, një shumë prej 400 mijë eurosh. Por planet e tyre nuk u realizuan dot, pasi policia ra në gjurmët e tyre. Tre pengmarrësit e lanë të lirë biznesmenin duke mos arritur të merrnin gjobën e kërkuar. Pasi kërkesa e tyre nuk u realizua, ata e lanë të lirë biznesmenin, duke marrë vetëm një shumë prej 13 mijë eurosh. Këto para iu gjetën me vete 59-vjeçarit në momentin e rrëmbimit. Policia greke ka arrestuar kështu grupin e përbërë nga tre shqiptarë, të cilët dyshohen si përgjegjës për ngjarjen e 24 tetorit të vitit të kaluar. Ata janë çuar në qeli dhe pritet të dalin përpara gjykatës greke, për të marrë dënimin në lidhje me këtë vepër penale të kryer.